La Usc di Ladins

Le pröm de dl’edema, é Maria da Màgdala jüda da doman adora, canch’al ê ciamó scür, fora dala fossa y á odü che la pera ê tuta demez dal sepolcher. Ara é saltada debota da Scimun Pire y dal discepul, a chël che Gejú ti orô bun, y ti á dit: »An á tut le Signur fora de sepolcher, y i ne savun nia, olach’an l’á metü. Dailó é Pire y l’ater discepul jüs ia y fora y é rová fora dal sepolcher; ai ê saltá trami deboriada, mo deache l’ater discepul ê plü asvelt co Pire, é chël rové por pröm dal sepolcher. Al s’á cufé jö y ite y á odü les fasces de lin ia por tera, mo al n’é nia jü ite. Tratan ê ince rové adalerch Scimun Pire, che ti gnô do, y é jü ite tl sepolcher. Al á odü les fasces de lin ia por tera y la peza dal assoius che ê stada söl ce de Gejú; ara n’ê nia pro les fasces de lin, mo dlungia, lobrida adöm te n post despartí. Spo é ince jü ite l’ater discepul, che ê rové por pröm dan le sepolcher; al á odü y á cherdü. Ai ne capî nia ciamó la Scritöra, che al messâ pö ressorí dai morc. (...) 

Parora dl Signur. – Lalt a te, Gejú Crist!