La Usc di Ladins

L é stat 6 egn empegnatives, ma ence riches de esperienzes e de sodesfazions, per Anna Facchini, trentina ma moenata de adozion, che de oril del 2018 l é stat la pruma femena te 150 egn a vegnir litèda a cef de la Sozietà di Alpinisć del Trentin, encèria che ge é stata dapò confermèda del 2021.

Anna Facchini la era doventèda sozia de la SAT del 1989 per tor pèrt a n cors de conservazion del ambient; dapò la era jita a fèr pèrt de la Comiscion per l stravardament del ambient da mont, e cdel 2009 la era stata litèda presidenta de chesta Comiscion. Su sia scomenzadiva l é stat ence metù su la Comiscion culturèla che ades la se cruzia ence del setor storich e de la conservazion de la biblioteca.

Ades do doi mandac l’à cognù lascèr l testamonech, che l é stat metù te man a Cristian Ferrari, enjegner ambientèl e glaciologh, stat president de la Comiscion glaciologica de la SAT ti ultimes trei egn.

Pec dis dant, ai 20 de oril l era stat la litazions per renovèr l Consei Zentrèl, che descheche perveit l Statut l tol ite 19 conseieres. I candidac i era 31 e tel Consei l é stat confermà ence na raprejentanta de fascia, la presidenta del Cai SAT Auta Fascia Licia Favé, che fajea jà pèrt del organism zentrèl ti ultimes 3 egn.

De più su La Usc stampèda de en vender ai 17 de mé.  (Lucia Gross)