La Usc di Ladins

Savëise che al é sté n tëmp sön chësc monn, olache al é mort fora feter düc i tiers dl mer y na gran pert di tiers söla tera. Cina ciamó él sté la maiú catastrofa che i conesciun y la plü gran estinziun che la tera ais mai odü. De ci che ara se trata avisa y ciodí che döt chësc é gnü a s’al dé, podarán descurí pro la mostra "Countdown to mass extinction?", che vëgn daurida en vëndres ai 14 de jügn dales 18:00 tl Museum Ladin a San Martin de Tor. La mostra se dá jö cun na estinziun de massa sozedüda dan passa 250 miliuns de agn y tira valgünes paraleles cun la crisa climatica d’aldedaincö, che se lascia sintí tres deplü, cun conseguënzes tres plü stersces sön natöra y porsona. La mostra instëssa ne i ciara nia ma al efet global, mo mët ince le focus sön la faziun di mudamënc chiló da nos. Por savëi plü avisa de ci che ara nen vá, se l’unse cuntada cun le curadú dla mostra – le paleontologh y colaboradú dl Museum Ladin Herwig Prinoth. Ël podará ince presenté i resultac de süa ultima inrescida sön les concores, olache al á descurí bëgn 10 sorts nöies.

La intervista cun Herwig Prinoth ciafëise t’La Usc di Ladins di 7 de jügn  (Intervista: Pablo Palfrader)