La Usc di Ladins

Giaurida »Äres«
L Circolo–Lia Mostra d’Ert, n culaurazion cun ELP–Ert por i Ladins, nvieia ala giaurida dla mostra culetiva, n vënderdi ai 14 de juni dala 18:00 tl self dla mostres dla Lia, a Urtijëi
Chindesc artistes dla Val Badia mët ora te chësta mostra dal titul »Äres«, che stluj ite doi paroles tant che omografes: Ëres (ëiles) y Ares. I lëures y la opres dedichei ala cun­sunanza dla doi esprescions, mostra su l liam sterch y la sinergia dla persones che à laurà deberieda per chësta mostra cun na gran ulentà de cunlaurazion.
La mostra resterà da udëi nchin ai 07.07.: merdi – venderdì, 16:00-19:00 y de sada y dumënia, 10:00-12:00 y 16:00-19:00.

Josef Kostner – cëves y ciavons
N

• 
•  

View the embedded image gallery online at:
https://www.lausc.it/manifestazions-y-evenc/27309-manifestazions-atuales-speziales#sigProId84084b68e1

vendërdi ai 7 de juni dala 20:30 vëniel giaurì tla galaria Vijion a Puntives na mostra dedicheda al artist Josef Kostner y n particuler ala tematica dl cë
L cë ie tl’ert, da for incà, n argumënt uni­versel, ajache l ie l’esprescion di pen­sieres esistenziei dl’umanità y dl raport danter la persona y si ntëurvia. Perchël iel y réstel for na gran funtana d’ispirazion artistica. Nfat ciuna persona che n artist reprejënta: zënza ulëi va pea nce si vester persunel. Nscila ie nce i cëves de Josef, che dij truep de ël nstës. A ti cialé a si lëures iel mpue coche platerné te n diare sucrët. Si scultures ie emuzions y senti­mënc te materia, coche si dessënies ie pensieres te risses de culëur.
La mostra resterà davierta dai 8 de juni nchina ai 1 de lugio, dal lunesc nchin la sada danter la 16:00 y la 19:00, o cher­dan su l nr. 338 2098697.

»Countdown to mass extinction?«
Le Museum Ladin invëia dër bel ala daurida dla mostra »Countdown to mass extinction?«, en vëndres, ai 14 de jügn dales 18:00, tl MusLa Ciastel de Tor
La mostra temporana pita n’odlada afascinanta tl’estinziun de massa plü grana dla storia dla tera y mostra paraleles cun le cambiamënt clima­tich atual.
Fora por la mostra condüj le paleon­tologh y curadú dla mostra Herwig Prinoth. En chësta ocajiun gnarál pité da bëre y da mangé; al sona Laura Willeit y Hubert Dorigatti.

N toch de storia da La Val
La Uniun Teater La Val

• 
•  

View the embedded image gallery online at:
https://www.lausc.it/manifestazions-y-evenc/27309-manifestazions-atuales-speziales#sigProId84084b68e1

á le plajëi da invié ales rapresentaziuns de »Amez tru – n toch de storia da La Val«
Le toch é na produziun originala dla uniun y cunta dl paisc da La Val, dl spostamënt dl zënter de Dlijia Vedla jö Plan Morin, dles sodesfaziuns y problematiches de chësta situaziun. 32 é les jobleres y i jobleri de vigni eté che fej para. Les ultimes rapresentaziuns sará en domënia ai 09.06. dales 17:00 (bele döt plëgn) y en mertesc ai 11.06. dales 20:00, tl salf Domëne Moling a La Val.
Prenotaziuns al 331 263 8288 dales 18:00 ales 22:00.

Renasciüda
Ai 16 de jügn vëgnel senté 1.000 lëgns tl bosch sura le paisc de Corvara, desdrüt da Vaia dan val’ agn
»Renasciüda« é le titul dla manifestaziun che gnará metüda a jí ai 16 de jügn a Corvara, da pert dla Cooperativa Turistica Alta Badia, Alta Badia Brand y WOWnature – plataforma de Etifor, sozieté benefit y spin – off dl’Université de Padova. Do le gran dann dla tempesta Vaia tl 2018 pro le bosch sura Corvara, tl raiun Planac, á vignun de nos la poscibilité da dé n contribut y daidé la natöra sentan n lëgn. An pó se chirí fora un di 4 apuntamënc fora por le de y düc i residënc ciafa n lëgn da senté. Por tó pert ala manifestaziun mësson se scrí ite ti ofizi turistics o ince online. Por evité da jí düc cun i auti cina sön le post, pón tó pert a n’escurjiun dal zënter da Corvara o anuzé le shuttle che vëgn metü a jí. L’evënt vëgn ince abelí dales melodies dl grup Gota. Pici y gragn é inviá da tó pert ala manifestaziun y adöm sunse bogn da fá tröp por presservé nosta bela contrada.

La Ila: Swim camp – isté 2024
La Uniun Sport La Ila mët a jí d’isté edemes de cursc da nodé por mitans y mituns dla scolina y dla scora elementara
I cursc vëgn tignis tla nodadoia comunala da La Ila, cun le maester Riccardo Broglio. Ai s’oj ai mëndri dla scolina (prinzi­pianc y progredis – anades 2020, 2019 y 2018) y a mitans y mituns dla ele­mentara (livel mesan y pro­gredis). La pröma edema é dai 15 ai 19 de messé, la secunda dai 29 de messé ai 2 d’agost (an pó ince se scrí ite a intrames les ede­mes). Al vëgn fat grups aladô dl’eté y dl livel y les leziuns döra 45 menüc. I cursc vëgn dagnora tignis dan­misdé. Le cost é de 80,00€. Les iscriziuns é da fá ma online sön www.uslaila.it. I posć é limitá. Informa­ziuns ala mail fitness@uslaila.it

Mesa maratona y di dla roda
La doi manifestazions vën a s’l dé n duman, sada ai 8 de juni
La mesa maratona Dolomites Saslonch ntëur ala Grupa de Saslonch ruva a si sesta edi­zion: l vën pià via da Pana dala 09:00, ulache l sarà pona nce l travert; ntëur la 10:30 sarà i primes bele ilò. Dala 14:00 saràl la premiazion pra l Hotel Cëndevaves.
L medemo dì saràl nce l Sella­ronda Bike Day. La stredes di jëufs ntëur al Sela unirà śaredes per l trafich (dala 08:30 nchin la 14:30), per ti lascé la lerch a chëi dala rodes. L vën pià via te Sëlva da Plaza Nives. La trassa danter Plaza Nives y Plan unirà inò giau­rida al trafich dala 09:30.

Senteda generela dl Schi Club Gherdëina
N merdi ai 11 de juni dala 20.00 tla gran sala dl Chemun de S. Cristina. L sarà nce la vela dl cunsëi nuef
L Schi Club nvieia a si sen­teda generela, ulache l unirà nce unerà i atlec y la atletes che se à fat merit ntan la sajon passeda.
Do la pert ufiziela, cun pro­tocoi, rëndicont y dé pro di conc, saràl nce la vela dl cunsëi nuef y di revisëures di conc. N passerà pona ala descu­scion te sala, ulache duc ie nviei a dì la sia y de fé prupostes. N ultima saràl mo la uneranza di atlec y dla atletes. L Schi Club Gher­­dëina se ncunforta.