La Usc di Ladins

Ai 26 de merz à la zentrela de Belun damandà do l joler per n ntervënt sun Ciaulonch, ulache n’ëila fova tumeda cun i schi y se ova rot na sciabla. Do la prima mediazion dl dutor iesen julei limpea tl spedel de Burnech.
Dala 14:00 à na ambulanza menà adalerch a Puntives n mut che fova tumà cun i schi y ova batù dassënn l cë – ël ie unì ciarià tl joler y menà deberieda a si oma tl spedel de Bulsan per n trauma al cë.
Dala 18:42 iel mo stat n ntervënt a Corvara – for per n nzidënt sun purtoi: n ël se ova rot l uf. N l à menà cun l joler tl spedel de Persenon.

Ai 27 de merz àn messù julé te Sëlva dala 19:10 per n’emergënza sanitera. Pervia dl bur’ tëmp ie la grupa furneda ite cun l auto per la prima cures al pazient. L’ambulanza l à pona menà nchin a Puntives da ulache l à pudù julé inant cun l joler nchin a Bulsan te spedel.
Ai 28 de merz à l Aiut Alpin fat trëi ntervënc: i primes doi per persones a chëles che l ti ova dat l bòt, ulache l ne n’ie purtruep te tramedoi i caji stat plu nia da fé. L terzo ntervënt fova te Sëlva, ulache na jëuna fova unida da nescia y ova damandà do l dutor. Do la prima cures l’àn meneda cun l joler a Persenon.
Cun l ntervënt ai 29 de merz à Al Aiut Alpin arjont l 500ejim ntervënt dla sajon: n ël che fova tumà cun i schi ie unì menà adalerch tla sënta a Puntives da n’ambulanza. Do che la duturëssa ti ova cialà àn udù che la ferida ne fova nia plu che n tan grieva y nscila à l pazient pudù furné inant cun l’ambulanza nchin tl spedel de Persenon.

Ai 30 de merz, dan marënda, à la zentrela cherdà l joler per n ntervënt sun Sochers: n’ëila fova tumeda tl funpark se fajan mel ala tibia. Do che n ti à dat zeche contra l mel iesen julei limpea tl spedel de Persenon.
Domesdì ntëur la cater iel stat mo n ntervënt a S. Cristina tl luech: n ël fova unit da nescia y canche n ie ruvei adalerch fòvel sot a reanima­zion – deberieda ala Crëusc Blancia iesen stai boni de l reanimé y n ie pona julei limpea tl spedel de Bulsan.
Ai 31 de merz ova n ël a Corvara problems cun la zirculazion. Do la prima cures àn menà l ël dla Talia tl spedel de Bulsan.

De plu tla edizion stampeda de La Usc di Ladins o sun l e-paper a paiament www.lausc.it/e-paper