La Usc di Ladins

Hoi Denise. Pudësses’a n curt te prejenté a nosc letëures?
Denise Mazzini Hoila a duc, son Denise Mazzini de Urtijëi y lëure coche nsenianta tla scola mesana de Sëlva. Son oma de doi mutans y patrona de n cian.

Ciuldì es’a cris ora de lauré coche nsenianta y ciun aspet de ti lëur te dà pa l plu sudesfazion?
É cris ora de deventé nsenianta, ajache l me fej legrëza a lauré cun i sculeies y la sculées y ajache posse i acumpanië sun na pert mpurtanta de si streda de vita. Udëi l pruzes de svilup che i mutons y la mutans fej ntan i trëi ani de scola mesana ie faszi­nënt. Ie nstëssa son na persona che mpera gën cosses nueves y se dà ju cun tematiches desfrëntes y perchël me sàl nce bel a pudëi ti nsenië y dé inant savëi nuef ai mutons y ala mutans. L ne n’ie nia de plu bel che udëi cun ce nteres che i sculeies y la sculés ti va permez a tematiches nueves y coche i scumëncia a analisé la cosses te na maniera critca. N auter aspet de mi lëur che me plej dassënn ie che l lëur da nseniant:a ne n’ie mei monotonn. Uni di ie autramënter y te porta ndesfides nueves. (Intervista de Sara Senoner)