La Usc di Ladins

Se à serà su chisc dis passé jun Busan i Mondièi de hockey su la giacia de la 1^ Divijion Grop A. 

Te chisc mondièi la Tèlia aea te sia formazion ence doi jiadores ladins, Diego Kostner de Gherdena e Michele Marchetti de Fascia, e tramedoi à podù scriver si inom anter chi di marcadores. 

L obietif per la Tèlia l era chel de ruèr al prum post per poder jir su te la Top Division, ma chest ampò no à garatà, ajache enceben la venta sorida per 8 a 1 contra la Corea del Sud, l suzes de l’Ungheria contra la Slovenia à decretà l prum post magyar, che l dì dant i aea batù la Tèlia al overtime, e desfantà coscì l ensomech di Azzurri, tolan demez mingol de legreza da la festa animèda dai musizisć de Gherdena DJ Simon e Pëufla.

Aldelà del ejit sportif, chisc Mondièi à fat orir te Fascia la fenestra di recorc de canche, avisa acà 30 egn, dai  25 de oril ai 8 de mé del 1994, paladina di Mondièi de hockey del Grop A l era stat, ensema con Busan e Milan, ence Fascia.

L era stat dassen na gran endesfida per la picola val ladina, n percors che aea portà l hockey fascian ai livie più auc e che l era peà via de gra a persones con gran capazità e gran gaissa per chest sport, desche Gianmario Scola e Ezio Anesi.

L responsabol del Comitat de endrez de chi mondièi l era stat Andrea Weiss, enlouta diretor del stadie e general manager de la sozietà. L era stat na gran ocajion de parbuda per Fascia, fazile la pruma outa che la val é jita en mondovijion.

De più su La usc stampèda de en vender ai 10 de mé.


 (Lucia Gross)