La Usc di Ladins

Atramënter co ti agn passá, olache an sogâ scialdi de sabeda o domënia cun önesc sogadus y sön le gran ciamp, vëgnel a Rina da 2 agn incá soghé 6 cuntra 6. Chësc sistem nü é gnü tut sö dër bun dai sogadus y ince la jënt da Rina vëgn ion a ciaré pro.
Chëra danter le US Rina y le FC Sëlva 1970 é stada na partida cun gröm de emoziuns. La partida se mët bun por la scuadra da Rina, che va en vantaje do da 17 menüc, cun n gol de David Huber. La resposta dl Sëlva vëgn atira: Seljvir Nemce fej le gol de parité 3 menüc dedô. Ara stá 1 a 1 y an conësc che intrames les scuadres ó la devënta. Püch dedô él Mirko Kerschbaumer che porta i gherdënes en vantaje por 2 a 1. Al n’é indere nia tëmp da se cruzié o da ponsé do. Do na bela trata dal piz de Thomas Ferdigg, che mosöra avisa söle ce de Alfons Facchini, garetel al 40^ menüt le 2 a 2. Alfons sëgna n gran gol de ce, cun döta süa determinaziun che i conescun bele dadî. La cogora vá avisa tl set; le portier gherdëna Guido Schmalzl pó ma plü ti ciaré do.
Trëi menüc do chësta aziun él Gabriel Prada che é bun da se paré dal sogadú aversar y sëgna le gol dl vantaje: 3 a 2 por la scuadra da Rina, che cambia insciö le resultat tl tëmp de 6 menüc.
Püc menüc dala fin i garetel ciamó a David le cuarto gol por süa scuadra; insciö se röia la partida sön le 4 a 2 por le Rina, che porta a ciasa na bela y combatüda devënta, cuntra i secundi te classifica. (DH)