La Usc di Ladins

S’à scomenzà ai 11 de febraro co ra Madona de Lourdes a Gnoche; poche dis dapò, ai 16 de febraro, ‘l é stà santa Giuliana, r’anpezana sant’Uriana, inze ra jeja de Alverà. Se śirà inaante fin de outon, co ra Madona de ra Salute ai 21 de noenbre a Ciadin e ‘pò sant’Andrea in Col, ai 30 de noenbre. L é ra devozion de ra śente de Anpezo par ra Madona, par i sante, che se vede inze duta chera jejes che ‘l é in śiro par ra val, inze ra viles, i vilaje.
El pioan de Anpezo don Ivano Brambilla ‘l à dito mesa, in Alverà, e dapò s’à podù fei doa paroles: »In Anpezo deboto duta ra viles à ra so jeja: chesto vien da ra devozion de ra parsones, coscita sta festes ‘s é ben sentudes da ra śente. Par i patrone de ra parochies ‘l é ra diozesi che dezide, o sedenò Roma; inveze par i patrone de chesta jejes ‘l é ra śente, co ra so devozion, che i zerne. On scomenzà ‘l an co ra prima festa a Gnoche, par ra Madona de Lourdes; ades son ca in Alverà, par santa Giuliana. L é senpre un grun de śente, chi de ra vila, ma anche parsones che vien da fora, da outre luoghe de ra val, e chesto ‘l é un segn de devozion«. (MDM)

De plu tla edizion stampeda de La Usc di Ladins o sun l e-paper a paiament www.lausc.it/e-paper