La Usc di Ladins

L event che dai 14 ai 16 de otober à sciudà ite l tendon de Poza l é stat vèlch da desferent dai tendons de sègra che sion usé a veder chiò entorn. Defat no se podea jir ite a comanèr »na bira«, ajache de bires n vegnia sport amancol 24 sorts desferentes. 

N era de chières, de rosses e de scures, corian duta la paleta de colores che la foes ne met dant te chest temp da d’uton; de cheles lijieres al perfum de agrumes, autres co la saor morbia de malt caramelà e de cheles più staifes, brausses o enfumièdes, ma aldelà de la preferenzes de gust de ogneun, la roba emportanta l é che l era dut bires de calità, fates da picoi produtores che vèrda da olache vegn la materia pruma che i doura e che i met sia pascion per chierir e enrescir saores e abinamenc neves e enteressanc.

L é oramai na bona dejina de egn che ence per chel che vèrda la bira à scomenzà a crescer l’atenzion e l enteres a chierir perferides de calità e l festival »La Bira te Fascia« ruà a la 8^ edizion, l à segur abù na gran pèrt tel portèr chesta sort de sensibilità ence te noscia val.

Chest event, peà via da l’idea e l empegn de trei amisc, Daniel Riz, Diego Riz e Roberto Nesi, l é nasciù desche scomenzadiva da d’istà a Ciampedel e chest an l se à tramudà a Poza mudan ence temp del an, per ge dèr l met de desfrutèr la ocajion ence ai operatores turistics fascegn, che de messèl i no à gran temp de tor pèrt.

I trei dis de Festival se à avert en vender passà apontin con na scomenzadiva duta neva, n »B2Beer« olache Renato Nesi à envià i operatores HoReCa, donca patrons o profescionisć te hotie, restoranc e bares, a se arvejinèr al mond del abinament gastronomich con la bira, en colaborazion con la Mèlga de Fascia. 

»Aon cernù chest temp del an apontin per poder se oujer più sorì a la jent del post« à dit l organisador Renato Nesi, che l ensegna comunicazion agroalimentara e marketing del turism a Siena. El l é da la Toscana ma l é n muie leà a Fascia da picol en su, tant da la conscidrèr sia seconda cèsa. »Saer che che vegn sport e co l sporjer l é de gran emportanza per fèr crescer la profescionalità te chest setor.«

De più su La Usc stampèda de vender ai 21 de otober.  (Lucia Gross)