La Usc di Ladins

L é etres trei studenc de la Scola de Fascia che i à abù l met de vegnir convoché ai Jeghes Olimpics te la Corea: Giada Delugan e Bryan Venturini te la spezialità de saut e combinèda nordica e Desi Rizzoli tel skicross.
Giada la é da Juan e la fèsc la IV LAF (artistich feguratif). Jà dant la fajea saut e combinèda con la Dolomitica e l’à cernù de fèr la scola auta te Fascia per seghitèr a fèr sport. I alenamenc de saut i vegnia fac ai trampolins de Pardac, ma ades i é do a fèr lurieres per la Olimpiades del 2026 e i cogn jir a Seefeld o a Tarvisio, enveze per l paslonch i pel jir fora Lago de Tieser o sun Lavazé.
Ai YOG l’à venciù la medaa de bron tel mix team a squadres ensema con Bryan Venturini e coi doi frèdes de Gherdena Manuel e Anna Senoner.
Bryan l é da Pardac, l fèsc la IV LAD e l é tel grop sportif de le Fiamme Gialle, l fèsc combinèda nordica da canche l aea 8 egn, l à scomenzà a sutèr sul trampolin de Pardac e l se à engaissà sobito per chest sport che met adum doi disciplines. Si resultac miores l é la medaa de arjent del an passà ai EYOF a Tarvisio e la medaa de bron de chest an ai YOG.
Desi la é da Ciavaleis, ma con mingol de reijes da Soraga, sia sozietà l é l Ski Team Ciavaleis e la é tel Comitat Trentin per l skicross col alenador Loris Donei.
L an passà l’à tacà a fèr l percors de scola e sport col projet del MIUR, ajache la é stata chiamèda a tor pèrt ai EYOF e ge é stat dat n tutor e la fazilitazions.

De più su La Usc stampèda de en vender ai 23 de firé.