La Usc di Ladins

»Scoita scoita che la Banda la te la conta…« coscita l é pontà via la contia de la Musega de Moena che, en domenia ai 13 de oril te teater de Navalge, la ne à fat far n viac tel temp, tel mond fantastich e te chel real, con sie conzert da d’aisciuda. Do se aer prejentà col toch ‘Opening’ de Ernst Hoffmann, la ne à fat montar su la naf di pirac en partenza da Navalge e viajar per mar anter tampeste e tormegn, anter canogn che sbara e tesores da robar, con ‘The rise of the Blackjack’ de Gerald Oswald. Endana che i museganc e le musegante sonaa, sot la reta semper ascorta del Maester Roberto Silvagni, la naratora Petra Felicetti ne à contà la storia emozionanta del Blackjack, la naf di pirac che va a l’aventura traversan l ozean.

Da na batalia a l’autra, dal mar a la tera, chela scombatuda tel Tirol del 1809 da noscia jent vidada da Andreas Hofer contra i ‘magna bavagnöi’ de chi franzousc de Napoleon. Na storia viva e da emozion che l Major de la Compagnia di Schützen Ladins de Fasha Manuel Adami, con sia mondura sun paladina, à interpretà te n ladin sćiantif menan dut l publich a viver endodanef chi avenimenc storics de nosc popul tiroleis che à segnà noscia Heimat.

Se pel lejer dut su La Usc nr 15 dai 18 de oril: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.

 (Monica Cigolla)