La Usc di Ladins

Me lecorde coche sce l fossa inier, che na candidata nia de rujeneda dl’oma ladina fova unida a fé n ejam de ladin. La ova desmustrà de avëi mparà bën nosta rujeneda dl’oma. Si frases fova articuledes y sce l ne fossa nia stat per l azënt tudësch, ëssen bele pudù miné che la fova chersciuda su cun l ladin. L presidënt dla cumiscion ti ova lessù damandà coche la ova pa fat a se njenië ca per l ejam. Cun lezitënza fòvela jita ai cursc pitei dal Istitut Ladin, ma dan se n jì da porta ora cun l diplom tla man, ova la candidata mo trat n sust, dijan: »Danz che l ne n’ie nia saurì a se njenië ca a n ejam de ladin, davia che ora dla zaites, televijion, radio, publicazions scientifiches y per pitli mutons, màncel da stramp zeche da liejer plu giut...«

Ove riesc capì cie che la minova. Te una na parola: »libri«, tesć de prosa, opres de beletristica che normalmënter se liej uniun de nëus per devertimënt, canche l uel se miuré te na rujeneda furesta.

Ivan Senoner

L articul tla edizion atuela de La Usc di Ladins.