La Usc di Ladins

La mort de Heinz Kostner á descedé n gröm de recorc y pinsiers liá a na porsona che s'á dé jö dër tröp por so paisc y por la comunité. Kostner é sté por 31 agn ombolt dl comun da Corvara, cina dl 2005, canche al s'á trat zoruch. Cun süa personalité sterscia ál dagnora salpü da aministré respetan l'interes dl comun y di zitadins. Te n momënt zite, de svilup turistich y urbanistich, ál albü na vijiun ampla y orientada al dagní, ti don vita a n paisc che porta ciamó aldedaincö la merscia di laurs realisá tratan i tröc agn sot süa aministraziun. Le svilup dl turism é gnü porté inant da Kostner ince tl interes de döta la valada, se portan ite tröp por la strada dla Val Badia. »Al desplej dër da messëi tó comié da Heinz Kostner, na porsona aprijada chiló Corvara, che á te süa aministraziun lungia salpü da porté inant n svilup sann, ince sce cun poscibilités limitades, mo cun de gran bries, cun gran savëi y capazité«, recorda l'ombolt da sëgn Robert Rottonara. Heinz Kostner ê ince n gran apascioné de fotografia y de sport. Por 44 agn alalungia él sté presidënt dl Club dles Rodes Val Badia, adöm cun Eduard Tavella che ê vize presidënt. Al á ince fat pert dl comité dla Maratona dles Dolomites, ti don na sbürla importanta al svilup dl turism dla roda te nüsc paisc. Tratan süa aministraziun al porté pro ala fondaziun dl Golf Club Alta Badia y ala costruziun dl ciamp da golf, sostignon i fondadus Siegele Kostner, Ernesto Costa y Richard Pescosta. Heinz Kostner fajô ince pert dl Socurs Alpin adöm cun Willy Costamoling y ê dagnora presënt tl hotel de familia, le Hotel Posta Zirm, che vëgn manajé aldedaincö da sü mituns. Por sües bries y so impëgn ti él gnü surandé dl 2007 la Crusc de Mirit dl Land Tirol. La redaziun ti sporj ai familiars les condolianzes plü sintides. Che Heinz pois palsé tla pesc de Chël Bel Dî.



 (kp)