La Usc di Ladins

Incër 130 rapresentanc di reviers dla ciacia de Südtirol é rová le vëndres ai 3 de ma tla Ciasa Runcher a San Linert, olache la Lia dla Ciacia de Südtirol á tigní en chësc ann süa sentada generala. La ospitalité di ghesć é gnüda organisada dal revier di iagri de Badia cun a ce le surastant Paul Valentin de Curcela, che á salpü da fá bela parüda y da lascé zoruch na buna impresciun danter i partezipanc.
Do avëi desfiré i punc plü aministratifs dla sentada, podesson feter dí che al é sté suradöt öna na tematica che á slominé deplü co les atres tla discusciun – chëra dla sensibilisaziun. La ciacia é n tema dër debatü y ince contesté, tan deplü él porchël important da avëi na comunicaziun aladô, che tëgn ince cunt dles sensibilités.
Chiló á lascé süa merscia le referat dla svizera Christine Fischer, iagra studiada y por pasciun, che á stlüt jö la université BOKU da Viena y che manajëia ince le blog dla ciacia "Hisch&Co".
Y propi l’importanza da ti comuniché la ciacia aldedaincö é ince gnüda tematisada tla discusciun dedô. Tut pert á chiló ince Luca Complojer, rapresentant ladin tla Lia dla Ciacia de Südtirol, che á bele do süa lîta metü la sensibilisaziun y la pedagogia sön la natöra sciöche dui pilastri de süa ativité.

I se l’un cuntada impara sön chësta tematica zitia. Ci che al nes á dit, podëise lí t’La Usc dl 31 de ma  (pablo)