La Usc di Ladins

Tan a-soziai che i social media pó ester, vëigon do la desgrazia sozedüda dan val’ dis a Luttach. N jonn de Puster che jô cioch cun l’auto é reflé te n grup de jogn todësc. Le bilanz é spaventus: 7 porsones mortes, dötes incër i 20 agn, y öna che combat ciamó por la vita. Na tragedia! N’atra parora ne me tomel nia ite. Tan de vites destodades, tan de vites segnades, tan de esistënzes trates sotissura. Por chi che resta zoruch él n dolur che i ne podun nia s’imaginé: i familiars che á pordü la möta, le fre, le jorman o la chestiana; i compagns che á messü ciaré pro; i spetadus zënza orëi; i socoridus che á ince en chësc iade ciaré da daidé y ará da sćiampí cun les imajes ciavades te sü recorc.
N dolur él ince por chël che á gaujé l’inzidënt. Süa vita é rovinada, por ne dí nia desfata. Al messará se porté söles sciables n pëis fora de vigni mosöra – sce al le tëgn fora. Le pëis de n fal che n gröm de nos ará bele fat, mo che á en chësc iade albü conseguënzes fatales. Tler che al n’é nia sté dërt, da rovëne do avëi boiü, y por chësc messarál paié.
Indere: ciamó denant che al vëgnes condané dala iustizia, é le jonn bele gnü condané mediaticamënter: da foliec che se scherza la müsa, da porsones che pronunziëia te internet cativeries y crudeltés che pé tutes dai tëmps plü scürs dla storia. I á odü aodanzes de mort, laurs sforzá, maledisciuns cina ala porjun por döta la vita. Al me vëgn stome. Al n’é nia da soporté, cun ci lisirëza che jënt spöda sentënzes, ascognüda do n monitor o n smartphone, nia dainré tl’anonimité de n inom inventé. Licari zënza müs y zënza pieté, che condanëia sciöche sce ai n’ess mai fat n fal te süa vita, despian la porsona ince dl ultim bordun de dignité. N sënn che ne portará zoruch gnanca öna dles porsones che á pordü la vita, mo che comporta forsc da nen copé daite d’atres che é ciamó chiló. Cuntra chisc tonns messunse se lascé sö. Rodunt te chisc caji adorunse umanité y empatia, la speranza da vire te n monn che te dá – ince ti caji plü pesoc – na secunda chance.  (Pablo Palfrader)