La Usc di Ladins

Löm vërda da pert dla Consulta dla jonëza ladina te süa sentada al plann anual por la promoziun dl sorvisc ai jogn dl grup linguistich ladin por l'ann 2020. Do l’arat positif dla Consulta vëgn sëgn le plann mené inant ala Junta provinziala che mëss ince dé süa aprovaziun. Al á tut pert ince ala sentada dla Consulta le vizepresidënt y assessur por la scora, cultura y jonëza ladina Daniel Alfreider. "Investí tles organisaziuns dla jonëza é n aspet fondamental por ti dé la poscibilité ales jones y ai jogn da se svilupé inant tres n’oferta ampla de iniziatives. I Sorvisc ai Jogn de Gherdëna y dla Val Badia laora te na manira dër profescionala y é n gran aiüt por les families, scores y sozieté", dij l’assessur Daniel Alfreider. Cun le ressanamënt dla Ütia de Pütia él gnü lapro n punt de incuntada tla natöra nia ma por i jogn dles valades ladines, mo de döt Südtirol y sura i confins fora, insciö Alfreider.
“La maiú desfida é zënzater chëra de renforzé la relaziun danter familia, scora y comunité, al é important odëi le sostëgn dl sorvisc por la jonëza sciöche na responsabilité coletiva, n ponsé interatif olache les forzes y les deblëzes se avaliëia fora reziprocamënter”, sotrissëia Carla Pedevilla, la responsabla dl Ofize Jonëza dl Departimënt Scora y Cultura ladina.
Le plann prevëiga ince la poscibilité da adoré personal pedagogich spezialisé tles organisaziuns joniles, ti sorvisc ai jogn y ti zëntri dla jonëza. Por la pomoziun dles ativités y di programs él preodü indöt 328.000,00 euro sot forma de contribuc. Implü él preodü da investí 20.000,00 euro por ressané le local di jogn da La Pli. Por la formaziun interna di colaboradus y dles colabradësses él gnü metü a bilanz 11.400,00 euro. Indöt vëgnel insciö metü a desposiziun söporjö 360.000 euro.
Le plann regolamentëia danter l'ater l’ampliamënt y le sostëgn finanziar dles infrastrotöres di jogn, la promoziun dles ativités, di proiec y di programs straordinars a bëgn dla jonëza. Implü se dá le plann ince jö cun le regolamënt sön les inrescides scientifiches, la conzesciun di contribuc promozionai y le program dles ativités dl Ofize Jogn dl Departimënt Scora y Cultura ladina.  (osp)