La Usc di Ladins

Le comunicat dl assessorat Alfreider dij insciö: "L’ann de scora ne gnará nia arlungé y l'ejam de stat dla scora alta gnará adaté ales esigënzes atuales: chësc é gnü anunzié dala ministra por l'istruziun Lucia Azzolina tratan la trascmisciun sön "La 7" en mertesc ai 17 de merz. La ministra ne vëiga degöna rajun por arlungé l'ann de scora, deache l’insegnamënt da ciasa funzionëia bun. Por ci che reverda l'Ejam de Stat vëgnel lauré sön tröpes opziuns – mo al é sigü che l’ejam fajará referimënt al material imparé tratan l’ann. L’assessur por la scora y cultura ladina Daniel Alfreider rengrazia dötes les families, les mitans y i mituns y dötes les insegnantes y i insegnanc y döt le personal dla scora ladina por la gran desponibilité da se adaté ala situaziun atuala. "Al é na situaziun dër ria che comporta tröpes dificoltés y sacrifizi. Al é por düc n gran sforz y la scora ladina á tut sö chësc mudamënt cun gran profescinalité y flessibilité. Dilan ince ales families y ales mitans y i mituns che fej le poscibl y dëida dassënn para da ciasa por ti dé continuité ala formaziun scolastica. I sun na picera comunité che desmostra da tigní adöm te chësta situaziun de emergënza", insciö Alfreider. An tignará ajorná geniturs, scolares y dötes y düc chi dl monn dla scora ladina cun informaziuns nöies tresfora tles proscimes edemes."