La Usc di Ladins

Do avei messù paussé per plu che trei meisc à la Comunanza Ladina a Bulsan endò tout su sia ativité: en sabeda ai 11 de messel 2020 s’à ladines y ladins dlafora enconté a la messa tradizionala ladina tla dliejia di Capuziners. I agn passés vegniva chesta festa tres zelebreda de mei dant passé via a la fin dl ann de scola y a les vacanzes de trueps.
Vigni mal é bon per val’ – aspetan enchin sen d’isté à la Comunanza podù se enconferté de avei desche zelebrant n joven ladin y primiziant, Stefano Trevisan di miscionars combonians, fi dla ex-presidenta dla Comunanza Patrizia Erlacher.
Siur Trevisan é vegnù consacré preve ai 28 de jugn 2020 y al à podù tegnì sia messa novela a Al Plan de Mareo ai 5 de messel. 
La messa a Bulsan é steda compagneda da la ousc dla presidenta Sabina Willeit y dal organist Nunzio Farella.
Do messa à i sozi dla Comunanza Ladina adum a Siur Stefano – samben tl respet dles normes sanitares de segureza – podù sté n pue adum te verzon dl convent y se la conté. 
N gran bel dilan ti và a Siur Stefano Trevisan, a pater Anton Beikircher y a si confredesc capuziners per avei endò ospité les ladines y i ladins te sia gliejia, y a les eles dla Comunanza che á daidé pro a l’organisazion. De setëmber él pervedù na jita naturalistica con l dr. Vito Zingerle te Fascia!

Sun l retrat:
Retrat recort con l primiziant: la presidenta dla Comunanza Ladina Sabina Willeit, Siur Stefano, l’ex presidenta dla Comunanza Ladina y oma dl primiziant Patrizia Erlacher.  (Iaco Rigo)