Dlungia al viadú che Don Ruccia tol fora de cöna él na zetola lasciada dai geniturs che dij che l'inom da i dé é Luigi y che ai ti ess orü bun por tres.
La cöna por tó sö viadus é te na ciasa dlungia la calonia, cun feriades cuntra strada y n gran placat che dij »Degun möt n'é n fal« mostran n retrat cun n nasciü y döes mans che pé s'al passé inant. La cöna é iló dal 2014 incá, arjignada ite cun les tecnologies che la scialda y alarmëia
View the embedded image gallery online at:
https://www.lausc.it/atualite/13132-degun-moet-n-e-n-fal#sigProIdc615570460
https://www.lausc.it/atualite/13132-degun-moet-n-e-n-fal#sigProIdc615570460
Chësc viadú é desche al baiass de na desperaziun de dui geniturs ales strëntes cun se instësc, zënza forzes por afronté le dagní... y al é na sort de speranza por nosta sozieté che ne l'á nia saurida: chësc viadú é nosc dagní, al nes dij che al á messü gní tralascé da chi che l'á metü al monn (por ci gaujes dagnora), mo che al é gnü tut sö y á ciafé lerch ti brac de jënt che ciarará de ël. Al nes mostra sü edli, nes lascia aldí sü scrais, al é la vita umana en porsona, y nia ma früt de n fal o na aziun desperada.
Le möt gnará socodí y istruí, al fajará pert de n dagní che é ciamó scrit tles stëres, al arpará la sozieté, cultura y l'amur che ti gnará dé dales porsones che l'acompagnará.
Tl'ambria di dis cialc de chësc isté s'ará scarzé le cör de na oma y de n pere, canche ai s'á destaché da so möt por le passé ia a na sort de coletivité che pé na salvëza, mo ne podará mai tó ite le post y l'amur de dui geniturs. Le su lian danter chisc geniturs y so möt é l'inom Luigi. Bunamënter le cherdarai datrai tl som, y canche ai aldiará zacai cherdan »Luigi« sintiarai na ficiada al cör, spo se consolarai, ajache Luigi é en vita, ma nia chiló! (de Iaco Rigo)