La Usc di Ladins

Ala fin dl 2019 cumpedân tl Südtirol rodunt 50.963 porsones da foradecá, ci che corespogn a na sona importanta dl 9,6%. Respet al ann denant án albü n aumënt de 630 porsones, tan co le 0,1%. Chëstes é ma valgünes zifres sön la migraziun tutes fora dal manual statistich 2020, presenté incö te döta la Talia, y insciö ince a Balsan. Le manual é gnü presenté dal diretur dl Ofize dl’Educaziun Permanënta Martin Peer y i dui referënc dl stüde de inrescida IDOS (Centro Studi e Ricerche Immigrazione Dossier Statistico) Fernando Biague y Matthias Oberbacher.

N terzo di foresć vëgn dala UE
Por ci che reverda nosta provinzia, é la porcentuala de jënt da foradecá plü alta co la media europeica y taliana, mo dl ater vers cotan plü bassa co i vijins dl Tirol (16%), á splighé Matthias Oberbacher. N terzo di foresć te Südtirol vëgn da naziuns dla Uniun Europeica, n ater 30 porcënt da naziuns europeiches fora dla UE, le 19% dal’Asia y le 14% dal’Africa. I albaneji é le maiú grup cun 6.000 porsones, dan i todësc, pachistans, marochins y romens.

Imigraziun: jënt jona
La jënt da foradecá é de regola plü jona co la jënt da chiló: le 68,8% di foresć á manco co 44 agn, ma le 4,4% á plü co 65 agn. Ince la popolaziun de foresć süsta sot les conseguënzes dla crisa corona. Chësc se lascia sintí le plü tl ciamp dl turism. Aladó dl Ofize Provinzial che monitorëia le monn dl laur, él sté da novëmber 2019 a aurí 2020 rodunt le 9,7% dles ëres y le 6,1% di ëi da foradecá che á pordü so laur. Pro la jënt dl post êl le 2,1% dles ëres y le 1,6% di ëi.

272 miliuns de porsones é "sön tru"
La migraziun resta inant n tema che reverda döt le monn. Dl 2019 án albü 272 miliuns de porsones che é "stades sön tru" á splighé Fernando Biague dl IDOS. Le numer de migranc é tresfora chersciü: dl 2015 n’êl ciamó 244 miliuns, dl 2017 n’êl bele 258 miliuns y sëgn 272. Danter i continënc che i ospitëia él al pröm post l’Europa cun 89,2 miliuns, dan l’Asia cun 77,5 miliuns, l’Amnerica cun feter 70 miliuns y l’Ozeania 8,7 miliuns.  (pablo)