La Usc di Ladins

I savun che por via dl virus él chëst’edema (y i speri ma chësta) gnü stlüt ince scores y scolines, o atramënter: che ares é ma stades davertes por mitans y mituns cun bojëgns particolars, o chi de geniturs che laora te ciamps relevanc por le sistem (sanité, ciases de palsa, alimentars, etc.). Scemia che chësc "sorvisc de emergënza" é da odëi de bun edl, ál ma sté püc che á podü l’anuzé. Tles scolines dla Ladinia de Südtirol á podü ite le 8,64% de mitans y mituns, che foss 57 sön 660 indöt. Tles elementares á ciafé l’insegnamënt de presënza le 10% di scolars dla Ladinia, tan co incër 110 sön 1.145. Les scores mesanes (dala 2. insö) y les scores altes ê bele denant tla didatica a destanza.

Tles scolines todësces á podü jí le 17,45% di mëndri, tles elementares todësces le 18%. Tles scolines talianes le 17% di mëndri y tles elementares le 12%.

Sce les scores y scolines vëgn daurides bele en lönesc che vëgn, depënn aladó dla Provinzia ince dala partezipaziun dla jënt ala campagna de test chësc fin dl’edema. An spera che an deures tosc indó les portes, por le bëgn di mituns, mo ince por le bëgn de chës families che ne toma nia ite ti "laurs relevanc por le sistem", mo é impó te de gran dificoltés y bojëgn.  (pablo)