La Usc di Ladins

350.000 é indöt i kits dl test antigen che la Provinzia de Balsan á a desposiziun por chësta campagna de relevamënt de caji de infeziun da coronavirus. La Provinzia dá fora aladó de informaziuns ciamó da verifiché por chësta inrescida chi 3,3 miliuns de euro. Porchël é i tests debann!
Südtirol che á do rata püc abitanc respet a d’atri raiuns teritoriai aministratifs (chi 532.000 abitanc indöt) pó s’impormëte chësta campagna: organisativamënter, logisticamënter y finanziariamënter. Le Venet, por ejëmpl, pó al momënt ma se aodé da podëi testé döta süa popolaziun. Le presidënt dla Regiun dl Venet Zaia á zacan n de bravé de n test antigen che vigni porsona pó fá da sora – ma che al n’é iló al momënt a desposiziun ma chi 5.000. La strategia da asfistié cun tests coletifs y debann les infeziuns é öna dles rezëtes plü efiziëntes y ütles por rumpí la morona da taché inant le virus, chësc desmostra la medejina empiricamënter: tla Cina él gnü metü da jí aziuns acribiches por tests coletifs a cités cun miliuns de porsones, la Slovachia á organisé tests a tapet por passa 3 miliuns de zitadins. Tl’Austria y tla Germania baia politics da orëi ince jí chësc tru di tests de massa.
I zitadins de Südtirol dess podëi chisc dis dla campagna fá le test debann ince te apoteches, pro doturs y te cliniches privates. La lista de chisc punc de sorvisc gnará ciamó publicada.

Mareo: i Stödafüs partësc fora les zetoles por tó pert al test
Da incö inant partësc fora te Mareo i Stödafüs les covertes cun i documënc personai por jí a fá le test. Ai vá da ciasa a ciasa. Tla coverta él da ciafé la cherta de invit dl Ombolt, che apelëia da tigní adöm, mostré sëns zivil y surantó responsabilité por se instësc y döta la comunité: "JON A FÁ I TESTS"!
Söla medema cherta de sot él scrit le post (por döt le Comun la palestra dles scores a Al Plan) y l’orar olache vignun y vignöna á da se presenté por le test antigen i dis 20, 21 y 22 de novëmber 2020: en vëndres ai 20 i tóchera dales 8:00 ales 13:00 a chi y chëres d’Al Plan (cun poscibilité de arlungiamënt cina les 18:00), y dales 13:00 ales 18:00 a chi y chëres da Rina; la sabeda ai 21 i tóchera döt le de a chëres y chi d’La Pli y Longega, en domënia ai 22 dales 8:00 ales 18:00 jarara spo ciamó inant cun chëres y chi d’Al Plan.
Al test ne vëgn nia inviá: i mituns sot i 5 agn, les porsones en carantena, i ghesć de ciasa de palsa y chi che á bele n resultat de n test nia plü vedl co 72 ores (dan dal mertesc denant).
Da se tó para al test él la detlaraziun che an ciafa te ciasa, scrita fora y firmada, cun lapró la zetola dles informaziuns söl tratamënt di dac personai, y ince la cherta sanitara o la cherta d’identité.
Le resultat dl test, negatif o positif, ciafa les porsones che á tut pert cina a na mesora do avëi fat le test: tres e-mail o cun na modalité SMS (fonin).  (Iaco Rigo)