La Usc di Ladins

Via per chisc ultimes meisc l’é entravegnù vèlch mudament te anter l personal del Comun General ajache, anter dependentes jites en maternità e neves encèries, l’ent l’à cognù jir a se chierir jent neva, soraldut per l setor sozio-assistenzièl e per l’ofize de secretariat.
N auter post ades l vegn metù dant per chel che vèrda l’Ofize per i Servijes Linguistics e Culturèi del C.G.F., n post lascià vet jà da vèlch meis ajache la Responsabola, la d.ra Sabrina Rasom, la é stata chiamèda a rejer l’Istitut Cultural Ladin “Majon di Fascegn” desche diretora. L termin per manèr ite la domana per chest post l’é pervedù per les 12.00 de en mèrtesc ai 9 de mèrz del 2021.

Un di requisic fondamentèi per chesta encèria l’é saer delvers l lengaz ladin. Chest ofize enfati l’é stat metù sù amò del 1995 per ge dèr atuazion a la normes che perveit la doura del bilinguism te duta l’aministrazions publiches de Fascia. Apede l cogn se cruzièr ence de meter jù ogne an ensema con la Consulta l pian de la cultura ladina per sostegnir e portèr inant scomenzadives de carater linguistich e culturèl a defendura e promozion de l’identità ladina. Tegnù cont de chisc fins donca, l vegn domanà de aer na bona cognoscenza entornvìa chesta materies: legislazion che revèrda l stravardament e la valorisazion de la mendranzes linguistiches e la competenzes di comuns e te nosc cajo del C.G.F.; nozions de linguistica e de soziolinguistica, soraldut per chel che vèrda la situazion ladina; cognoscenza de la carateristiches geografiches, sozio-economiches e culturèles de Fascia e de la Ladinia. Amò apede vegn domanà ence nozions aministratives dintornvìa l’ordenament di comuns e de la comunitèdes te la Region Trentin Südtirol; nozions de derit publich e aministratif con referiment a la Aministrazion Publica; apalc e contrac publics, prozedimenc aministratives (L.P. 23/1992) e azess ai documenc; prinzipies dintornvìa l’ordenament finanzièl e contabol di Comuns de la Region Trentin Südtirol e auter amò. Duta la informazions é da poder troèr te l’avis metù fora dal C.G.F. opuramenter sul sit de chest Ent.
Per chel che revèrda i titoi, apede a l’atestat de cognoscenza del lengaz e de la cultura ladina de livel C1, vegn domanà: diplom de laurea de trei egn entornvìa lengac e cultures modernes, opuramenter scienzes politiches e de la relazions internazionèles, scienzes de la comunicazion, opuramenter diplom de laurea de amancol 4 egn, te la medema specialisazions, ciapà aldò del veie ordenament universitèr.
Se recorda che i candidac à da tegnir en conscidrazion la despojizions per l’emergenza sanitèra COVID-19: tel moment de la identificazion i cognarà declarèr de no aer condizions de pericol aldò de la desposizions en doura te chela che vegn metù a jir la proes. Anter chesta condizions l’é sintomes de petorcena, temperatura maora che 37,5 degrees, vegnir da raions a risech o aer abù contac con persones positives al virus ti 14 dis dant.
Se pel aer duta la informazions aló da la Canzelarìa del Comun general de Fascia dal lunesc a la jebia con orarie 08.30-12.00 / 14.30-16.30 e de vender 08.30-12.00; e-mail: segreteria@cgf.tn.it / telefon: 0462 – 764500, olache se podarà ence domanèr l formulèr per scriver ite la domana de amiscion a la selezion.
L’avis de selezion e l formulèr enjignà per la domana de amiscion a la selezion publica i é publiché sul sit del Comun general de Fascia: www.comungeneraldefascia.tn.it