La Usc di Ladins

Ales lites regionales tla Catalonia á i partis d’independënza catalans tl Parlamënt Catalan davagné pormez 4 scagns. La "Süd-Tiroler-Freiheit" fej les congratulaziuns tres n comunicat stampa che i reportun.
Di 135 scagns ti vá 74 ai trëi partis d’independënza "Esquerra Republicana de Catalunya (ERC)" (33 scagns), "Junts" (32 scagns) y "Candidatura d’Unitat Popular (CUP)" (9 scagns).
"I movimënc independentistics á insciö 4 scagns deplü co ti agn passá tl Parlamënt y laora fora süa maioranza", insciö la "Südtiroler-Freiheit".
La ERC – le movimënt de man ciampa republican dla Catalonia – á avisa tan de scagns co chi che s’arata i davagnadus dla lita, i Sozialisć (PSC). Chisc ne sará nia bogn adöm ai atri partis nazionalistics da formé n govern (al ó ester 68 scagns).
Deache la coaliziun di ultims agn, metüda adöm dai independentisć, á davagné lapró stima y scagns, él da s’aspeté na continuaziun dl govern y dla idea da se destaché tres deplü da Madrid. "La chance por na independënza pratica dla Catalonia é chersciüda, sëgn ól ester les forzes da sfruté chësta chance", insciö Christian Kollmann dla Süd-Tiroler Freiheit.

Grafica di resultac dles lites: ©TV3 Catalunya