La Usc di Ladins

Te n comunicat stampa firmé insëra do la dezijiun de Speranza manifestëia Bonelli döt le desplajëi defrunt ala dezijiun 5 menüc dan les dodesc da ne daurí nia i lifc y les pistes tla Talia, gnanca ti "raiuns ghei".
Cënc de Profescionisć dla nëi liá ala Scuola Italiana Sci s’á arjigné ca y organisé da edemes incá aladó di Protocoi y le Vademecum preodüs por podëi pié ia cun incö, ai 15 de forá 2021, almanco ti "raiuns ghei". Insëra á le Minister Speranza taié les previjiuns y speranzes da pié ia. "Chësc n’é degun respet por nosta categoria, che ti dá laur a 15.000 families y é chita dai 10 de merz 2020 incá", insciö Bonelli.
La AMSI s’aspeta sëgn n sostëgn finanziar adaté (por tal.: "ristoro") da pert dl Stat por sté sura ega ia, "do chësc tira y mola de nostes istituziuns sarunse inant chic, y sce i ponsun che al podess gní dezëmber 2021 denanche i podunse pié ia, messunse araté che i sun bëgn 21 mëisc zënza laur" – insciö desplajü le presidënt dla AMSI Bonelli.


 (Iaco Rigo)