La Usc di Ladins

Tres l’aprovaziun dla "Legge delega" ai 30 de merz jarál en forza ince provedimënc importanc por les families. Un de chisc é chël che é gnü tlamé le "Assegno Unico" por les families, che dess pié ia cun le 1. de messé 2021. En sostanza se tratera de n sostëgn finanziar ales families cun mituns. Al vëgn paié fora cina che i mituns á complí 18 agn – eté che pó rové a 21 sce i mituns y les mitans stüdia o é zënza laur. Les zifres avisa n’é nia ciamó definides, mo al vëgn baié de n import che vá dai 50 ai 250 euro a möt/a, vigni mëis. Soma che se müda aladô dl’eté dl möt o dla möta. Ince sce la mosöra é ciamó da definí ti detais, se tratera por la Talia de na dezijiun che an podess feter definí "storica". La Talia ne s’á cina ciamó nia propi alzé fora por so reconescimënt y sostëgn finanziar ales families. Cun chësc provedimënt fejon n gran vare inant. Positiva ince la reaziun dla assessuria provinziala de Südtirol Waltraud Deeg, che baia de n vare tla dërta direziun: "Al é bun che ince le stat talian á reconesciü che por le sostëgn ales families ól ester na politica familiara ativa. Chësc sostëgn ne pó indere nia resté le su provedimënt: Al ó ester na politica dles families a 360° y sön vigni livel."  (pablo)