La Usc di Ladins

»Giustizia de reparazion te la comunitèdes: da la reflescions a l’azion sul teritorie« l’é n projet pissà e metù a jir dal Zenter de Giustizia de reparazion de la Region Trentin Sudtirol en colaborazion coi Ofizies locai de Ejecuzion Penala Esterna e del Servije Sozièl per i mendres, finanzià da la Cassa de la Pentijions.

L projet, che l’é dò a vegnir metù a jir ence per Fascia en colaborazion col Comun general de Fascia e autra realtèdes dal post.

La pruma azion concreta perveduda l’é chela de endrezèr n portel de mediazion di conflic sozièi: ogne azion che ge fèsc del mèl ai etres l’é dolor, per ge fèr front a chest dolor pel esser de utol n lech olache l mèl padì l pel vegnir contà e scutà a na vida da scomenzèr a se cognoscer da nef.

Conflit vel dir bega, scombatiment e contrast, ma ence confront feruscol e percacent, l’é ence n moment de crescimonia, scombater per se scontrèr.

L conflit, se l vegn neà, se no se ge fèsc front o l vegn banalisà, metarà i protagonisć te na condizion de solentum e de dolor che sofoa, enveze se l vegn metù al luster, tout en conscidrazion, contà te duta la vides, recognosciù desche n element che fèsc pèrt de la relazion, l pel doventèr vèlch che deida a miorèr e a meter a jir n nef »orden«.

La proponeta de la Giustizia de reparazion met tel prum post la persona che l’à padì n fèr burt (o n reat), sie besegnes e sia storia, ge dajan l met de tor pèrt se la vel a na vida ativa a n percors dessema a chi che ge à fat del mèl, a na vida che chest abie l met de se tor sù la responsabilità de chel che l’à fat e l comede ti confronc de la persona che à padì, ma ence tel contest comunitèr olache l fat l’é sozedù.

La Giustiza de reparazion l’é na Giustizia che proa a comedèr la relazions te la sozietà. La é caraterisèda dal prefis ‘re’, recognoscer, reparèr, recostruir, restabilir, reconzilièr, rescomenzèr, la varda inant e la fèsc referiment a la possibilità de na reparazion generativa, zenza descancelèr nia, alincontra recordan dut, ma da n nef pont de veduda per ogne esistenza e per duta la comunità.

L portel l’é avert su apuntament, aló da la senta del Comun general de Fascia; ge vel chiamèr l numer 351 2024593 opuramenter scriver ite na mail a la direzion: sportellogr@gmail.com

Chel che vegn dit te la scontrèdes l’é secret e l servije l vegn sport debant.


 (lg)