La Usc di Ladins

Fenì l prum mandat de set corì dai trei conponenc Dario Pallaoro, Luciana Rasom e Giada Nicolussi, che no podea più esser confermé, la nomina di trei neves componenc, jà sburlèda na outa, no l’à bù bon ejit nience anché.

Perveduda en mèrtesc ai 20 de oril da doman, al prum pont de l’orden del dì del Consei provinzièl, la nomina é stata sburlèda al domesdì per spetèr la conferenza di capigrop. Se à cognù ruèr a mesa les 7 da sera, dò na longia discuscion, per la votazion, che era a scrutinie secret.

I conseieres cognea cerner trei di cater inomes proponec: la ladina Katia Vasselai, avocata da Sèn Jan e coordenadora per la Regon Trentin Sudtirol del moviment de Forza Italia »Azzurro Donna«, la  mochena Chiara Pallaoro, ence ela avocata a Trent, inom che dò na contratazion aea abù la condivijion de sia comunanza de partegnuda, condivijion che enveze no era stata arjonta dai cimbres, tant che l’era doi i inomes sul desch per la più picola mendranza: Matteo Nicolussi Castellan, colaborador per la produzion de articoi per cimbro e Rodolfo Nicolussi Moz, educator e autor de percorsc didatics tel lengaz cimbro.

La nomina de l’Autorità, perveduda a l’art. 10 de la Lege provinzièla nr 6 dai 19 de jugn del 2008 su la mendranzes linguistiches, cogn vegnir fata dal Consei provinzièl con amancol i 2/3 de la stimes, ma l quorum no l’é stat arjont ajache duc i componenc de la mendranza no à dat jù sia stima, conscidran che no duc i curricula di candidac i respone ai requisic pervedui da la norma de “persones de auta e recognosciuda profescionalità e competenza giuridica, sozièla e culturèla”, e che aesse abù maor peis la nomina politica, apontin chela che l quorum di 2/3 de l’aula vel schivèr.

A la fin l’é stat demò 19 i litanc, donca la nomina à cognù endò vegnir sburlèda.

De più su La Usc stampèda de vender ai 23 de oril.

 (Lucia Gross)