La Usc di Ladins

“Persona - Existenz - Essenz” é trei paroles che desten fora n fil che lieia adum l’umanité. Cie pón pa nes impensé anter l’esistenza, y l’essenza dla persona? Doi joegn artisć ladins se à dé ju con chestes domandes y chisc conzec che fej fora vignun de nos, laoran sun sies operes; anter les pitures de Elisa che é n rondenì dles persones te nosc temps y dl raport che an à con i massmedia, y les scultures de Hannes che lieia adum i materiai che la natura nes pita y l’osservazion dla realté y di contesć culturai. 

Elisa Rungger da Rina y Hannes Mussner de Selva à imparé da se conesce tla Scola d’Ert a Urtijei, olache ai à trami metù man sie percurs artistich, che ai à porté inant y foradecà: sen frecuenteiai l’academia a Karlsruhe. Ai 22 de auril ài podù inauguré la pruma mostra comuna, olache an pò vedei sies operes, tla galaria storica, la Galerie Koenitz, a Lipsia tla Sassonia. N jolantin publiché ti portai internet à apié nosta atenzion y perchel sonse jus a ti fé na intervista dopla ai doi joens sun si laour y si planns. Ai nes à conté cie che l’esposiziun nes spligheia, l leam che l titul à con les operes y sciche ales respidleia la realté. Con gran plajei nes ài spo ence dit che ai ne se à nia achieté pro chest projet, ma ai é bele tl laour da enjigné ca la proscima mostra, che sarà da vedei dai 5 de jugn enfin ai 25 de messel tla galaria d’ert "Kunstraum Vincke-Liepmann" a Heidelberg.

Liejede do l’intervista con l’artista y l artist tla edizion atuala de La Usc di Ladins!

Söl retrat: Pitura "Im Café" de Elisa Rungger.  (Iaco Rigo)