L gran ziclism e la Dolomites à semper abù n leam strent fat de fascinazion, agonism, fadia e suzesc. Sarà coscita ence per la edizion numer 105 del Giro d’Italia e amò de più con la penultima tapa, chela che ruarà sun Fedaa.
La corsa resa del 2022 é en program dai 6 ai 29 de mé con partenza te l’Ungaria olache sarà trei tapes e dapò ciapèr endò ite da la Sizilia e vegnir en su per la Tèlia con trei jouves anter i più cognosciui.
L classich ‘tapon’ de la Dolomites, che fazile dezidarà la classifica finèla e segur l ge darà gran luster a dut l raion dolomitan, l pontarà demez da Belun, l passarà per Sedico, Sènta Giustina e la Certosa de Vedana, l ruarà tel Cordevol e l vegnarà en su travers Ègort e Cencenighe. Chiò sarà la ertes di trei jouves finèi: l jouf de Sèn Pelegrin con si 1918 metres, sobito dò l Pordoi e Cima Coppi con si 2239 metres e tinultima l Fedaa con si 2057 metres, tedant al gran crep e giacion de la Marmolèda.
Ence del 2022 la Dolomites se entenjarà de resa col gran apuntament ziclistich che portarà endodanef gran publich. En sabeda ai 28 de mé l Giro passarà fora duta Fascia, da Moena enscin a Cianacei, per dapò jir sun Pordoi e ju te Fodom, Rèba, la Plì de Fodom, Cernadoi e su a Soteguda, Malga Ciapela e Jouf de Fedaa con la tapa finèla.
De più su La Usc stampèda de vender ai 19 de november. (MCI)
La Dolomites se entenc endò de resa
L Giro d’Italia 2022, en program dai 6 ai 29 de mé, passa fora la valèdes de Fascia e Fodom.
Galaria retrac
View the embedded image gallery online at:
https://www.lausc.it/atualite/17812-la-dolomites-se-entenc-endo-de-resa#sigProIdc3585c2c96
https://www.lausc.it/atualite/17812-la-dolomites-se-entenc-endo-de-resa#sigProIdc3585c2c96