La Usc di Ladins

Ince la provinzia de Balsan é tl bel mez dla ona nöia de coronavirus, plü avisa dla varianta "Omicron", che é cotan plü tacosa co les atres. Por fortüna él indere dorata manco porsones che röia ti ospedai, ci che tëgn tla provinzia la situaziun relativamënter stabila. Tles ultimes 24 ores él gnü registré tl Südtirol 175 infeziuns nöies tres test PCR y 960 tres test antigenich. La gran ona de infeziuns n’á nia sconé les valades de Gherdëna y Badia, olache al é gnü a löm bëgn 86 caji nüs. An á insciö sëgn 759 porsones atualmënter positives. N dat che se lascia sambëgn ince odëi sön les carantenes, provedimënt che atoca tles döes valades ladines bëgn 855 porsones.

ATUALMËNTER POSITIFS (cun

• Foto: 123rf
•  

View the embedded image gallery online at:
https://www.lausc.it/atualite/18262-le-virus-a-galop-ince-te-badia-y-gherdena#sigProId58426c1e17

variaziun respet al de denant)
Corvara 32 (+7)
Badia 119 (+14)
La Val 64 (+3)
San Martin 45 (+5)
Mareo 74 (+5)
VAL BADIA 334 (+34)

Urtijëi 244 (+24)
Santa Cristina 87 (+12)
Sëlva 94 (+16)
GHERDËNA 425 (+52)


CARANTENES (cun variaziun respet al de denant)
Corvara 44 (+14)
Badia 140 (+12)
La Val 73 (+4)
San Martin 47 (+5)
Mareo 77 (+2)
VAL BADIA 381 (+37)

Urtijëi 275 (+25)
Santa Cristina 94 (+15)
Sëlva 105 (+16)
GHERDËNA 474 (+56)


REGOLES NÖIES POR LA CARANTENA
Cun incö lönesc ai 10 de jená é jüdes en forza regoles nöies por la carantena. Chësc vare án fat por le gran numer de infeziuns nöies che vëgn pormez vigni de. Por dötes les porsones che ciafa n test positif al virus, velel sëgn de regola la carantena de 21 dis, che pó indere gní ascortada te cotan de caji.
Porsones positives zënza sintoms che á la terza variora o la secunda (nia plü vedla co 120 dis) á ma bria da sté 7 dis en carantena.
Porsones positives zënza sintoms che n’á degöna variora o che á ciafé la secunda dan da plü co 120 dis stá 10 dis en carantena.
Por gní fora dla carantena mëssel a vigni moda ester danman n test negatif. Sce le test ala fin dla carantena toma ciamó positif, mëss la porsona sté inant isolada. Al vëgn spo fat n secundo test tl 14. de. Sce chël é ince ciamó positif, se röia la carantena do 21 dis.
Porsones positives cun sintoms mëss impröma avëi n test negatif y ester almanco 7 dis zënza sintoms, por podëi gní fora dla carantena.  (pablo)