La Usc di Ladins

L Comun General de Fascia porta inant ence chest an n percors de sensibilisazion, informazion e formazion per cognoscer, sostegnir e valorisèr l empegn de chi che rencura n familièr de età e che no pel per se.

Chest percors fèsc pèrt del projet »Curainsieme«, nasciù da n grop de lurier metù adum da raprejentanc de Provinzia Autonoma de Trent, Servijes Sozièi de la Comunitèdes de Val, Azienda Provinzièla per i Servijes Sanitères, UPIPA, Fondazion Franco Demarchi, Consolida e Consulta provinzièla per la sanità.

L percors é stat prejentà te na scontrèda metuda a jir en mèrtesc ai 12 de oril te sala grana del Comun general de Fascia, tant en prejenza che col met de tor pèrt online.

A averjer la scontrèda l é stat la Conseiera de procura al sozièl del CGF Mirella Florian, che l’à rejonà de la fegura de »caregiver« e de sia emportanza semper maora, e donca del besegn che ence l publich se cruzie de chest, con percorsc de sostegn e formazion, ma ence con azions legislatives che posse ge dèr degnità e segureza a chesta profescion de persones che rencura e dèsc didament a chi che no pel più l fèr enstesc.

La dotora Serena Bortolato de la Fondazion Franco Demarchi de Trent, che la fèsc pèrt del desch de »Curainsieme« à dapò prejentà l projet e l percors, che te Fascia l vegn portà inant da profescionisć sanitères e sozièi del teritorie te n cors debant de 7 scontrèdes, che vegnarà endrezà te la sala grana del Comun General.

L cors che jirà ite avisa sun duc chisc aspec l pea via dai 19 de oril e l vegn metù a jir de mèrtesc domesdì da les 5 a les 7, enscin ai 31 de mé, en prejenza col met de tor pèrt ence online. Se cogn se scriver ite al più prest a la Fondazion Franco Demarchi Tel. 0461 273717, mail: barbara.noldini@fdemarchi.it o se oujer ai Servijes sozièi del Comun General de Fascia a Sèn Jan.

De più su La Usc stampèda de vender ai 15 de oril.  






 (Lucia Gross)