La Usc di Ladins

En domënia, en Palsacrusc / l‘Assënza / Ascensiun, ai 29 de ma dl 2022, podará dötes les porsones che á le dërt da lité tl Südtirol dé jö süa usc sön chësta domanda de referendum:
"Sëise a öna cun le test dla lege sön les 'Mudaziuns dla lege provinziala di 3 de dezëmber dl 2018, n. 22, ‘Democrazia direta, partezipaziun y formaziun politica’, y dla lege provinziala di 8 de forá dl 2010, nr. 4, ‘Istituziun y regolamënt dl Consëi di Comuns’', aprovada dal Consëi provinzial di 11 de jügn dl 2021 y publicada sön le Boletin Ofizial dla Regiun nr. 27 di 8 de messé dl 2021?"

Por ci liton pa?
Le test de lege sotmetü ala litaziun müda les leges di 3 de dezëmber dl 2018, nr. 22 (Democrazia

• foto: freepik/license
•  

View the embedded image gallery online at:
https://www.lausc.it/atualite/19677-en-domenia-el-da-ji-a-lite#sigProId1aeec36414

direta, partezipaziun y formaziun politica) y di 8 de forá dl 2010, nr. 4 (Istituziun y regolamënt dl Consëi di Comuns).

Le test de lege nü prevëiga mudaziuns:
La lege nöia sotmetüda a chësc referendum müda desposiziuns desvalies dles leges provinziales nominades tla domanda dl referendum; les leges provinziales sotmetüdes a chëstes mudaziuns regolamentëia da öna na pert la democrazia direta, la partezipaziun y la formaziun politica a livel provinzial, y dal’atra pert le Consëi di Comuns.
Le comité che á coiü adöm les firmes por arjunje chësc referendum baia che l’intenziun dla Junta provinziala é da agaié la "democrazia direta" y inviëia da lité "NOU".
Les leges provinziales nr. 22/2018 y nr. 4/2010 romagn en forza te süa verjiun atuala cina che al vëgn eventualmënter aprové le test de lege nü dala maioranza de chi che vá a lité (usc por le SCE). Sce la maioranza de chi che litëia dij NOU ales leges provinziales nr. 22/2018 y nr. 4/2010, ne vëgnel fat degöna mudaziun (usc por le NOU).
Al pó tó pert al referendum les zitadines y i zitadins che á cumplí 18 agn ai 29 de ma dl 2022, é scric ite tles listes litales y á le de dla publicaziun dla convocaziun dla lita la residënza tl teritore dla regiun Trentin-Südtirol da cater agn zënza interuziun, y de chisc cater altamo dui tl teritore dla provinzia de Balsan.

Quorum
Por le referendum confermatif n’él nia preodü N QUORUM; chël ó dí che le referendum valará bel anfat tan de jënt che vá a lité.
La maioranza dles usc davagna.

Sce al davagna le SCE
Sce la maioranza de chi che litëia dal referendum litëia de SCE, promulghëia le Presidënt dla Provinzia le test de lege nü, che vá insciö en forza. Les döes leges provinziales “Democrazia direta, partezipaziun y formaziun politica” y “Istituziun y regolamënt dl Consëi di Comuns” vëgn mudades. La maioranza de chi che litëia confermëia le test dla lege, che é bele gnü aprové dal Consëi provinzial.

Sce al davagna le NOU
Sce la maioranza de chi che litëia dal referendum litëia de NOU, ne vá le test de lege che müda la lege provinziala “Democrazia direta, partezipaziun y formaziun politica” y la lege provinziala “Istituziun y regolamënt dl Consëi di Comuns” nia en forza y n’á degöna faziun. La maioranza de chi che litëia ne confermëia nia le test dla lege, che é bele gnü aprové dal Consëi provinzial!