La Usc di Ladins

Neif, giacia e crep te sie front de zirca doi chilometres da la man trentina l à ciapà ite ence l percors de la “via normale”, olache l era cordèdes de rampinadores.

Do l alarm ruà da les 13.45 i socorsc de la Protezion zivila é peé via sobito da Fascia, dal Trentin e dal Venet. L é stat domanà l intervent de 6 jolieres e apede al Socors da Mont l é entervegnù i gropes coi cians da levina, i Studafech, la Polizia, i Carabinieres, la Finanza, rué ence da la provinzies de Busan, Belun e Unejia.

La operazions vegn coordenèdes te la caserma de protezion zivila de Cianacei, che l é ence la senta del Socors Auta Fascia. Chiò l é ence l vizeombolt de Cianacei Dimitri Demarchi e l é ruà l president de la Provinzia de Trent Maurizio Fugatti.

I ferii – l numer giust vegnarà fat a saer dal Socors da Mont te la ores che vegn - é stac porté ti ospedèi de Trent, Belun e Busan. L é stat recuperà ence 4 persones che no se à fat mèl.

Do aer bonificà l front de la levina sul teren, ence coi cians, vedù l pericol de etres destaches de giacia entorn les 15.30 l é stat fat entervegnir l jolier de Trentino Emergenza con la “ciampèna Recco” tecnologia durèda per chierir la persones e recognoscer ogne segnal possibol.

L presidie jirà inant per duta sera e ence de net ma endèna no l é socoridores sul post per l pericol de etres destaches e na ordenanza di Comuns de Cianacei e de La Rocia descomana a duc de se arvejinèr.

 (Lucia Gross)