La Usc di Ladins

Ai 26 de jené l é stat endrezà la pruma scontrèda del grop de lurier metù su da la sociazion Transdolomites che tol ite i teritories olache rua la linea 180 de coleament anter Busan, Val d’Ega, Neva e Sèn Jan.

A chest desch à tout pèrt Heinz Delago del Servije Trasporc de la Provinzia de Busan, Loris Comellini per KSM l Consorzie di autotrasportatores del Sudtirol, Stephanie Völser del Ofize turistich de Neva, Nicolò Weiss che col prum de oril sarà ofizialmenter l nef diretor de l’ApT de Fascia, Giulio Florian ombolt de Sèn Jan, i Polins, Marco Danzi de la Qnex de Busan e Massimo Girardi president de Transdolomites.

Te chesta scontrèda l é stat valutà i ponc de forza, i ponc critics e la prospetives del potenziament del servije de trasport publich. »No l é assà aer demò n bon servije de mobilità publica – à dit Massimo Girardi. Ge vel far rei a livel de comunanza a na vida che l servije no vegne conscidrà demò desche n grop de pulman che porta viajadores da na destinazion a l’autra ma che l dovente semper de più n strument emportant de crescimonia a livel sozial, economich, ambiental per sentadins e ghesć.«
I ponc de forza vegn dal fat che semper più jent tol la linea 180. Do l’analisa di dac metui sun desch e ence en conscidrazion de la conferma de colaborazion economica da man de la Provinzia de Trent che paa la speises di chilometres da la man trentina, l é stat tout la dezijion de smaorèr i oraries per chest istà de la linea 180, con scomenz dai 17 de jugn, dal lunesc al vender, fora che de sabeda e de domenia.

Vegnarà metù su la neva corses che da Vich ponta via da les 9:04, da les 10:04 e da les 13:04; da Busan da les 7:37, da les 8:37 e da les 11:37 e l slongiament de la corses dal Jouf de Ciareja fin a Vich da les 16:37 e da les 17:37.

De più su La Usc stampèda de en vender ai 15 de mèrz.

 (Monica Cigolla)