La Usc di Ladins

L é passà encomai 10 egn da canche, de jugn del 2014, i conscric del 1964 da duta la valèdes ladines e vejines se aea binà ja Pardac per festejèr i 50 egn tel segn de legreza, unità e amicizia.

L era stat na fran endesfida e l’aea abù n gran bon ejit: aea tout pèrt passa 140 ladins da duta la 5 valèdes: n era 80 da Fascia, 25 da Gherdëina, 26 da la Val Badia, 8 da Fodom e 7 da Anpezo, apede a chi da Fiem e da etres raions vejins.

L grop de feruscoi organisadores l é metù ensema da conscric de Fascia e Fiem e per Fascia fèsc pèrt Luisa Lorenz, Francesco Mazzel e Antonella Winterle. Duc é autertant engaissé e vertesc a meter en pe endodanef per i 60 egn na gran festa autertant bela, che chest an vegnarà endrezèda proprio tel cher de la Ladinia, sul crouscdevia de la valèdes: l apuntament é per en sabeda prum de jugn a Cianacei, aló dal Gran Tobià Teater & Hexen Disco Klub.
Per poder endrezèr dut ge vel che la enscinuazions rue dant che sie fora i 20 de oril. Descheche aon jà scrit, la festa vegn endrezèda en sabeda prum de jugn aló dal Gran Tobià Teater & Hexen Disco Klub a Cianacei. Per ogne informazion se pel scriver a: coscrittidolomiti.1964@gmail.com o se oujer ai referenc de val: per Anpezo l é Clara Dariz; per la val Badia l é Anna Pitscheider; per Gherdëina l é Gottardo Bernardi, Manuela Perathoner e Roswitha Perathoner; per Fodom l é Giaci Denicolò e per Fascia l é Fabrizio Defrancesco, Luisa Lorenz, Francesco Mazzel e Antonella Winterle.