La Usc di Ladins

Zacan en de sunse stada chita pa en banch, dlungia en vestí d’ega, iadó na plaza dai jüc por mituns, nia dalunc na plaza dai auti. En banch olache trepes porsones röa pormez. Ciarenn ia por tera, ái odü con gran spordüda tan de zigarec che al ea. Plën! Con gran ligrëza sái da avëi te gaiofa en scarniz y na manëcia de nailon, y atira ái motü man da i chëie adöm. Do avëi rodé jö döta la spersa, ái tla man le sach plën, na cuantité desco les mans davertes motüdes öna dlungia l’atra a forma de ciadin. Trec fömadus ne ponsa nia co sciüré, y olá, le zunfo; valch magari se fej le ponsier che ia por tera é le prigo de medefü mënder, porchël ne chirai nia na condla dal ciomont. Püc de nos, fömadus o nia, sá tan da tosser che i stumbli de zigaret é. Le zigaret enstës é pö cuaji en miraco dla industria dal tabach ponsenn che al contëgn cina 4000 (!) chemicalies. Trec de chisc tosseri romagn endô tal filter al momont che an á roé da föme. Roé röa le filter spo tla natöra, o dit miú: tal’ega tal terac, sce an ne le mët tal ciomont. I filtri vën fac con zelulosa y les chemicalies vën enjuntades por i fá dër stersc. Ensciö dörera da 10 cina 15 agn cina che le filter s’á deplën desfat y desfanté tla natöra. Sce i ponsun ai miliuns de stumbli co vën sciürés ia por tera vigne de se rendunse fosc cunt ci dann che cösc comporta por la tera. Al basta önn en stumbl de zigaret t’en liter d’ega por copé mec i pësc co noda lëite. Ci soluziuns anse pa? Le fömadú respetus pó ciafé zigarec con filtri ecologics co se desfej zonza lascé dann. Al é ince la poscibilité da i cheie adöm por i dé jö te posć olache ai vën reziclés fajenn produc nös denfora. Al é ince tres plü posć olache an pó i sciüré demez te contegnüs aposta.