La Usc di Ladins

Nöt d’arjënt
N apuntamënt nü che pita en mercui ai 29 de messé 2026 na sëra sot les stëres cun l’osservaziun dl cil, musiga dal vi y val’ spezialité gastronomica a Badia
La novité de chësc isté a Badia á inom »Nöt d’arjënt« y ara se trata de na manifestaziun che liëia musiga, le firmamënt y la gastronomia. Ai 29 de messé, en ocajiun dla löna colma, pón ji sö cun le implant »La Crusc 1« por se gode na sëra speziala che mët man cun na cëna de cater derzades pro les döes üties Nagler y Lé. Canche al vëgn scür, án spo la poscibilité da osservé les stëres y la löna colma adöm a deplü esperc de astronomia. L’osser­vaziun dles stëres vëgn acompagnada da n conzert al clavier cun Arnold Mitterer che sonará tl scür dla sëra. La sëra gnará abelida dala lüm de chentli y ciandëres, che cheriëia n’atmosfera speziala y de relassamënt. La manifestaziun mët man dales 19:00 cun la daurida dl implant y an gnará jö dales 22:30 tres cun l’implant. Por tó pert ala »Nöt d’arjënt« ól ester na prenotaziun pro i ofizi turistics dl’Alta Badia. En cajo de burt tëmp vëgn la ma­nifestaziun spostada ai 30 de messé.

Tosc l’opereta ladina »Franzi«
Tl zënter d’La Pli de Mareo gnaral presenté dai 6 de agost 2026 inant por ot iadi, tres dales 21:00, la opereta ladina nöia scrita da Iaco Rigo y Alex Trebo
Do l’opereta ladina tl 2018 »La Zin­gaindra«, s’arjignon a La Pli ala rapre­sentaziiun dl toch nü dal itul »Franzi«. La regia é de Erika Castlunger, la di­reziun musicala de Maria Craffonara. Les rapresentaziuns sará chisc dis: jöbia ai 6.8., vëndres ai 7.8., sabeda ai 8.8., domënia ai 9.8, y spo l’edema do, jöbia ai 13.8., vëndres ai 14.8., sabeda ai 15.8. (en Santa Maria y feragost) y do­­­mënia ai 16.8.2026, dagnora dales 21:00. Les prenotaziuns di posć söles tribünes vëgn bele sëgn tutes sö tres whatsapp (menan messaji de test o audio) al nr. tel. +39 393 5137302. Dai 27 de messé inant saral ince la poscibi­lité da telefoné por prenoté.

Incuntades leterares cun auturs talians
Fora por l’isté mët a jí l’Alta Badia ince en chësc isté na seria de apuntamënc cun auturs taliagn
Dai 27 de messé cina ai 18 d’agost án la poscibilité da tó pert a incuntades cun perso­naji dla leteratöra taliana tl salf dles manife­staziuns a Corvara. 
Les incuntades cun i auturs trata temesc d’atualité, d’economia, de storia, de sport, de sanité mentala y tröc d’atri temesc. N valgügn apuntamënc gnará abelis da musiga dal vi cun Simona Bondanza y Roberto Gorgazzini.
Chisc i scriturs che an podará incunté en chësc isté:
27.07 dales 18.00: »Tastiere in gabbia. De­mocrazia e libertà di informazione a rischio« de Massimo Nava
01.08 dales 18:00: »Anna K. Il romanzo della straordinaria vita di Anna Kuliscioff« de Tiziana Ferrario
02.08 dales 21:00: »Cina e Stati Uniti: il gran­de confronto« discusciun cun Francesco Costa y Giada Messetti che baia di ecuilibri geopolitics
04.08 dales 18:00: »Qualcosa che brilla« de Michela Marzano
07.08 dales 18:00: »Due vite. Slalom in parallelo con mia figlia Federica Brignone« de Maria Rosa Quario
09.08 dales 18:00: »La mente radiosa. I cibi e i pensieri che nutrono il cervello e rischia­rano la vita« de Eliana Liotta
11.08 dales 21:00: »La casa dimenticata« de Pegah Moshir Pour
14.08 dales 18:00: »Parlami d’amore. Un viaggio scientifico nel desiderio, nella passione, nei legami« de Antonella Viola
16.08 dales 18:00: »Finché durerà la terra« de Giovanni Grasso
18.08 dales 18:00: »L’economia facile. Risposte semplici per capire il mondo« de Carlo Cottarelli
Deplü informaziuns söla manifestaziun ciafon sot ala plata internet www.altabadia.org

Fostüs dles ëres tla musiga
En lönesc ai 27 de messé dales 21:00 sona te dlijia da La Ila le »Ensemble Maddalena«, cun n repertore de componistes che á lascé süa merscia tla musiga
Che ê pa Vittoria Aleotti, Mad­dalena Casulana, Ju­lie Pinel, Kassia, Anna Ama­lia di Prussia o Elisa­beth-Claude Jaquet de la Guerre? Te ci ambiënc laurâ y viô pa chëstes com­ponistes? Cio­dí é pa propi ëres sta­des bones da fá stam­pé y pu­bliché sües operes, te n tëmp olache le rode dla ëra ê scial­di lié a compic da ciasa? Ci áres pa deboriada? Y ciodí savunse pa ciamó alde­daincö, te n tëmp de n gran barat informatif, tan püch de chëstes personalités?
Le program dl conzert »female imprints« é dediché a chëstes componistes y presënta stories che se ascogn do chëstes artistes ia. Al nasc na inrescida artistica rica de suspense y de scenars, che á le fin da fá aldí usc che ne á nia podü se lascé aldí inlaota.
Al sona le »Ensemble Maddalena« cun le sopran Maria Ladurner, Anne Suse Enßle al fabló, Philipp Comploi al cello y Alessandro Baldessarini ala liuta y tiorba.

Franz Schubert y la »Wiener Musik«
Le Festival Badiamusica vá inant ai 28 de messé dales 21:00 te gran salf a Corvara, cun n repertore de musiga popolara y tradizionala vieneja
Protagonisć dla serada é le trio »Arpeggione.200« cun Peter Hudler (chitara a archët), Andreas Teufel (orghi Schrammel) y Daniel Fuchsberger (contrachitara y zitra). Al sará da aldí n re­pertore dla »Wiener Musik« tradizionala, cun musiga de Franz Schubert, sön trëi invenziuns stromentales vienejes originales dl XIX secul. Ci che parô dal mëteman n’idea stravaganta, se á tosc desmostré sciöche na porta de azes a n monn sonur spezial y poetich: la chitara a archët tl ensemble cun l’armonica Schrammel y la contrachitara, se desmostra na formaziun particolarmënter naturala: chestiuns de for­mulaziun, ritm y carater se stlarësc gonot da sores. L’apuntamënt é por en mertesc ai 28 de messé dales 21:00, tl salf dles manifestaziuns a Corvara.

Musiga

• 
•  

View the embedded image gallery online at:
https://www.lausc.it/manifestazions-y-evenc/32242-manifestazions-atuales-speziales#sigProId861178f265

»De raisc y ares«
Le Festival Badiamusica pîta en domënia ai 2 d’agost dales 21:00 n conzert te gran salf a La Val, cun le »Trio Erinus«
»From roots and wings« é le titul dl conzert interpreté dal »Trio Erinus« cun Sonja Wall­nöfer, Alex Designori y Anja Theiner. Le pro­gram se roda incër les origines, le cam­biamënt y les melodies dades inant da genera­ziun a generaziun. 
Chësta musiga ne resta nia medema. Ara se svilupëia, vëgn trasformada y ascutada danü te na prospetiva contemporana. Sciöche pro n lëgn, sinton inant les raisc, deperpo che al crësc valch de nü. 
Cun dui saxo­fons y n clavier, porta dant le trio melodies tradizionales che vëgn da cul­tures desvalies te n contest contemporan. Tematiches fami­liares comparësc te tonalités nöies, le monn antich y chël modern se incunta. Composiziuns originales y aranjamënc com­pletëia chësc dialogh.

Franz Comploi y Bach
En lönesc ai 3 d’agost dales 21:00 él te dlijia de Badia n conzert dl orghelist Franz Comploi, che nes condüj te n »iade musical fora por l’Europa, cun Johann Sebastian Bach«
Le Festival Badiamusica pîta ai 3 d’agost a Badia n iade musical fora por l’Europa, cun toc por orghe de Bach y dles generaziuns da denant, che vá dai Paisc Todësc ala Talia cina tla Francia. Chësc percurs mostra sö les tradiziuns esecutives regionales che le genie de orghe Bach á imparé da conësce y aprijé – y che al á ala fin trasformé te so stil. 
La vijita de Johann Sebastian a Dietrich Buxtehude a Lübeck é stada particolara; ara ti á scinché tröpa ispiraziun y ince n valgönes dificoltés por la dorada de süa sojornanza. Girolamo Frescobaldi unësc la fantasia contra­puntistica cun le talënt musical tla racoiüda »Fiori musicali«. »Chi questa Bergamasca sonerà non poco imparerà«.

Lí te ander: »Giù Giù« de Pierluigi Donna y Fausto Gilberti
Na storia ilustrada por mitans y mituns da un di auturs plü aprijá tla Talia en mercui, ai 29 de messé 2026 dales 17:00 ales 18:30 tl Museum Ladin Ursus ladinicus a San Ciascian
Tl sonn somiëia Marta le monn sot sü pîsc, y acompagnada da Scuti, n pice descompositur, esplorëiera galaries y impara da conësce n gromun de te’ pici abitanc dl terac. 
Na storia ilustrada por mitans y mituns da un di auturs plü aprijá tla Talia, che nes cunta tan che romuns y microorganisms fej por le bëgnsté de düc canc y ciodí ch’al é important da sconé chësc habitat prezius, le terac. Dedô laboratore creatif. L’entrada é debann.

Monologh »Benvenuti in Val Badia« de Simon Kostner
Al Museum Ladin Ciastel de Tor a San Martin en jöbia, ai 30 de messé 2026 dales 21:00
Che é pa i Ladins? Ciodí é pa les Dolomites miste­rioses, strinades? Ci vë­gnel pa cianté les sëres da d’invern y ci porta pa adöm les bales y i pësc da tinta da file? Te n mo­nologh original y demor­vëia, nasciü da n lian visceral cun süa tera, cunta Simon Kostner dla Val Badia; intrecian memoria personala, cul­tura ladina y teater.

»The Cherry«, musiga dal vi al Ciastel de Tor
L’apuntamënt é ai 1 d’agost 2026 dales 20:00
»The Cherry« é n duo dla Val Badia, metü adöm da Emily Kostner y Mattia Lezuo. Adöm cun cater d’atri musicontri porti sön paladina so proiet nü intittolé »The Cherry Live Music Concert«, na tour de cater conzerc dal vi. 
So program tol ite toc originai y covers de de gragn artisć sciöche Queen, Michael Jackson y tröc d’atri. L’apuntamënt tla Val Badia sará ai 1 d’agost dales 20:00 a San Martin al Ciastel de Tor. L‘entrada é debann cun poscibilité da prenoté n post da se senté söla plata internet https://the cherrymusic.com/concert

Oda al isté
Conzert

• 
•  

View the embedded image gallery online at:
https://www.lausc.it/manifestazions-y-evenc/32242-manifestazions-atuales-speziales#sigProId861178f265

dl Cor Kerygma cun Unknown Brass en sabeda ai 1. d’agost dales 20:30 te Dlijia de Badia
A n conzert dediché ala musiga sacrala tl respet y tl lalt dla sajun dl isté, inviëia le Cor Kerygma adöm al grup de stromënc a fle Unknown Brass. 
Söl program él toc sacrai de­sco Musica Dei de John Leavitt, l’Exsultate de Mark Burrows, l’Alleluia de Sally K. Albrecht, le Cantate Domino de Mark Hayes. Ala fin porta dant le cor adöm ai stromënc brass le toch gospel »Don’t say ‘no’ to Jesus«.

Te Museo con Petra
Tel Museo Geologich de la Dolomites a Pardac l é n percors studià per ge permeter ai bec de descorir l museo en autonomia con sia families
L é na beza feruscola e curiousa al Museo Geologich de la Dolomites de Pardac, senta teritorièla del MUSE de Trent. L’à inom Petra e l é la protagonista de n percors che à inom apontin »Scopri il museo con Petra«, con ativitèdes pissèdes per la families, per poder descorir l museo coi bec en autonomia. Na picola guida de esplorazion per peèr via te n viac su la Dolomites patrimonie mondièl Unesco e emparèr a entener chel che crepes, fossii e minerèi pel ne contèr su la marevees de la storia de nosc raion.
L material per chest percors l à n cost de 3,50 euro e l é conseà per bec dai 6 ai 10 egn. Se pel l domanèr te entrèda del Museo de la Dolomites de Pardac, che l é avert dal mèrtesc a la domenia da les 10:00 a les 13:00 e da les 16:00 a les 19:00. Info su www.muse.it

La Festa Ta Mont varda en aut
Organisadores e volontadives ve speta te Val de Sèn Nicolò a Poza en sabeda e domenia 1 e 2 de aost per se goder, magnar, beiver e cognoscer mingol miec l alpinism
La é ruada a la 19ª edizion, la festa che ence chest an ve speta te la Mont de Poza con 20 stonc gestii da le sociazion de volontariat per ve sporjer de bona magnadiva, piac de la tra­dizion e douces golousc, ma ence entrategni­ment per picoi e gregn: la teleferica, l saut tel fegn, jeghes sportives e laboratories. E no menciarà musega e legreza sun dut l percors.
Chesta festa à ence atenzion per la cultura e ogne an vegn cernù n argoment: chest’outa vegn portà dant l tema del alpinism, ajache rampear vel dir lejer la mont parola per parola, varech do varech. Se podarà donca cognoscer mingol de storia e veder art e massaria di ram­peadores de angern e de anché, per ve sporjer na esperienza autentica. Le grignade e la gaissa di volontadives resta semper medeme per ve secodir con amor.
Se pel ruar ite col servije de pulmins a paament da Vidor fin te Sauch, che pea via da le 9:00 da doman e l fenesc da le 18:30 o a pe da desvalives troes, ence compagné dai menacrepes con prenotazion te ofize di mena­crepes de Poza, tel. 331 2989721- infopozza@fassasport.com.
L program
En sabeda e en domenia 1 e 2 de aost te la Mont de Poza da le 10:00 verc le tieje e sco­menza i jeghes e da le 11:30 se taca a dar fora da marena. Da le 10:30 e da le 16:00 tel stont de Bambi l é l laboratorie con Mariachiara.
En sabeda da le 14:00 vegn enaudà la mostra fotografica sul rampear e da le 14:30 l é l spetacol (S)legati. En domenia da le 11:00 vegn dit la messa aló da la capela te Mesaselva. I stonc sera tant en sabeda che en domenia da le 18:00.
Dute le informazion le é sul sit internet www.festatamont.it.
Ve speton duc con gaissa e legreza!

Panorama Music con mendranzes
A Moena ai 26 de messèl Evi Mair Olympus Band e ai 30 Lia Sampai
L Val di Fassa Panorama Music sporc conzerc sa mont apede a refuges, te paisc a Moena e da sera tel Music Club La Grenz.
Col projet JMMJ chest event fèsc cognoscer gropes e musizisć de desvaliva mendranzes col sostegn de l’ApT de Fascia, la Region Trentin Sudtirol, la Provinzia de Trent, l Comun General de Fascia, l Comun de Moena e la FPB Cassa.
En domenia ai 26 de messèl da les 18:00 te Sote­grava a Moena (se l é burt da les 21:30 a La Grenz) sarà Evi Mair Olympus Band coi miores musizisć de Sudtirol, anter chisc l la­din Max Castlunger. 
Ai 30 da les 21:30 a La Grenz la ciantautora cata­lana Lia Sampai e sia band col nef album ‘Un Delta Fràgil’. 
Ai 8 de aost sun Lujia al Chalet Valbona sarà l quintet trentin Heiny’s Gang e ai 12 e 13 de aost da sera a La Grenz sonarà l pianist messican Fernando Diaz.
Duc i conzerc é debant, a La Grenz se pel ite con tessera Arci, l program l é sui social de Fassa Panorama Music e de La Grenz e su www.fassa.com.

Pruspetives nueves tl Tublà da Nives
Tl mëns de agost saràl da udëi tl Tublà da Nives te Sëlva na mostra che ti dà lerch a cater artistes y artisć jëuni:es de Gherdëina
Christine Runggaldier, Valeria Stuflesser, Damian Piazza y Thomas Delazer mët ora si lëures sot al moto »Prospective«.
La giaurida dla mostra ie n vënderdi ai 31 de lugio dala 20:00.
La ntroduzion artistica sarà de Danila Serafini. Dla curnisc mujighela se cruzia Marie Stuflesser.
La mostra resta davierta nchin ai 30 d’agost, uni di ora che de lunesc dala 16:00 ala 19:00. De merdi, mierculdi y vënderdi nce dala 20:00 ala 22:00.

»Foli Tama« – grupa de mujiga y cianties tradiziuneles dl’Africa uzidentela
L Circolo – Lia mostra d’Ert de Urtijëi Ve prejënta n cunzert, che sarà n juebia ai 30 de lugio dala 21:00 tla Cësa di Cungresc de Urtijëi
Foli Tama ie na grupa de mujiga y cianties tradiziuneles dl’Africa uziden­tala, metuda adum da cin’ percuscionisć da plu pertes cun a cë l griot Lancei Dioubate. I musizisć ie ruvei adalerch aposta dala Guinea per fé cunëscer si mujiga ora per l mond, coche prima ucajion propi a Urtijëi.
L’ert ie na esperienza fundamentela per l’umanità y pieta la puscibltà de crië ressunanzes danter cultures desfrën­tes y de giaurì lerch per ancun­tedes auten­tiches danter la persones.
Ntreda: dunfierta liedia.