La Usc di Ladins

En mertesc dan Capiun á la Cooperativa Turistica Al Plan/San Martin indô metü a jí le "Carlascé d’Al Plan", cun la gran defilada che s’á slarié fora da plaza dla CT cina dan paiun de paisc. Na bisca lungia a chëra che bëgn 92 grups á tut pert, cun incër 400 porsones mascherades sö y almanco ciamó tantes dlungia strada a fá festa impara. Sce ara é garatada tan bun, él sambëgn mirit dla jënt che á fat para – grups, uniuns, families, compagnies – che á davëi mostré creativité y fantasia. Por la cornisc musicala á sambëgn fistidié la Musiga d’Al Plan, che é dagnora al apel te chësta ocajiun. Lapró á la Cooperativa Turistica ince invié adalerch le grup brasilian "Forteza" da Verona y la "Tiger Dixie Band" da Trënt, che s’á spo ince lascé aldí do la defilada sön paiun, canche al é gnü premié les mascores plü beles. Iló á ince valgügn ostis fistidié che al gniss sorví val’ de cialt da bëre y de golus da mangé.

Dilan al fotograf Gianvito Coco, che nes á metü a desposiziun chëstes impresciuns fotografiches  (pablo)