La Usc di Ladins

Chi dl ’63 festejëia i 63
Ai 26 de setëmber vëgnel organisé na marëna por düc i nasciüs y les nasciüdes dl 1963 dla Val Badia
»Nos dl 63 festejun i 63 agn«: chësc é le motto dla incuntada che vëgn tignida por dötes y düc chi che é nasciüs dl 1963 dla Val Badia.
L’apuntamënt é por i 26 de setëmber tl »Rifugio Capanna Nera«. An s’incunta dales 12:00, olache al sará la marëna cun intratignimënt musical. Al é da se scrí ite, paian le contribut de 100,00€ sön le cunt IBAN IT61A 08010 58341 000401418734. Informaziuns ciafon ai numeri 335 1409093 o 335 6235003. Poscibilité da parché él pro la plaza dl golf a Corvara.



25 agn Museum Ladin

• 
•  

View the embedded image gallery online at:
https://www.lausc.it/manifestazions-y-evenc/32459-manifestazions-atuales-speziales#sigProIdeab0676004

Ciastel de Tor
En sabeda, ai 5 de setëmber. Por zelebré deboriada chësc aniversar él deplü manifestaziuns, cun na escurjiun a Lungiarü, l’at ofizial y la presentaziun de na inrescida, musiga y aurela cörta
Dales 14:00 ales 16:00 él na escurjiun tla Val di Morins cun Giovanni Mischí y Herwig Prinoth. Tratan na spazirada gnarál baié de geologia y dla contrada da paur, dl’autarchia da n iade y de co che al gnô sfruté la forza dl’ega por mëte a jí siëies y morins. An s’incunta dala cialciara a Lungiarü, dan la capela comemorativa »Ojöp Freinademetz«. Prenotaziun al 0474 524020 o a prenotaziuns@museumladin.it.
Dales 17:00 tl Museum Ladin Ciastel de Tor él le salüt ofizial da pert dla presidënta Stefania Pitscheider y dla direturia Katharina Moling. Dedô presentaziun di resultac dla inrescida »Trame di valle. Un’analisi reticolare tra turismo e pratiche abitative in Val Badia« dl’antropologa Valentina Campesi. Introduziun de Daniela Salvucci. N proiet de inrescida che ti ciara ales trasformaziuns sozio–economiches y culturales dla Val Badia ti ultims 50 agn. Che é pa i protagonisć de chisc mudamënc aldedaincö? Cun ci mesi agësci pa y co se partësci pa sö le podëi?
Dales 18:00 inant aurela cörta cun DJ set de Silt (duo elena & alma), Louis and the Space Travellers y DJ set cun proieziuns video sön le Ciastel de Marco_o.



Saus di paurs tl paisc de Badia
Na iniziativa nöia che dá la poscibilité da vijité deplü lüsc da paur y descurí i produc locai, por cujiné na spëisa ladina
L’iniziativa »Saus di paurs« vëgn metüda da jí por le pröm iade la jöbia ai 10 de setëmber, tl paisc de Badia. Ara se trata de n evënt ponsé fora dai scolars dles scores altes da La Ila tl proiet »Scola y turism«. I partezipanc fajará domisdé na escurjiun fora por i pra y i lüsc da paur, pian ia dala dlijia de Badia, adöm a Caterina y Helga. Ai podará vijité i lüsc y imparé deplü sön i produc dl lüch, mo ince sön la natöra y les erbes. Ala fin röia le grup pro la ütia »L’ Tamá«, olache al gnará arjigné ca na spëisa ladina cun i produc coiüs adöm tratan l’escurjiun. Do avëi imparé da cujiné les tutres, ciafarán na bona cëna. Por tó pert al’escurjiun mësson se scrí ite ti ofizi turistics dl’Alta Badia.



Nëinesc y laves: unide cun vosc nepoc y nepotes!
La lia La Vëta nvieia a n di criatif te berstot
I mutons y mutans possa ziplé, mudelé, depënjer o dessenië… Y chël deberieda cun si nëinesc y laves. Unide tla sënta dla lia La Vëta, che ie tla via Senton 71 tla berstot de Doss. L sarà n sada, ai 12 de setëmber, dala 10:00 ala 13:00 y dala 15:00 ala 19:00.
Te chësc orar pudëis unì y jì canche ulëis, l ne costa nia.



Urtijëi 1860 - sun la piedies de n mudamënt
Na spaziereda cun la diretëura dl museum Paulina Moroder n vënderdi ai 11 de setëmber dala 18:00
Na manifestazion dl’ »Enes dl’Ert – art festiVal Gardena«, scumenciadiva culetiva dla Lies di artisć y istituzions cultureles de duta Gherdëina.
Co cialova pa Urtijëi ora ntëur l 1860? Ce persones, ideies y svilups economics à pa fat deventé l luech da paur n zënter mpurtant dl ziplé tl lën y dl’ert religëusa?
Pion via dala mostra »Pec de n mond« tl Museum Gherdëina: cun la diretëura dl Museum, Paulina Moroder jons a scuvierjer da plaza Sant Antone nchin sun plaza de Dlieja, cëses storiches liedes ala produzions y al cumerz de ert y chiena.  
Finon via cun n aperitif sun plaza de dlieja per stlù ju cun chël che on audì y udù. La manifestazion ie debant, ma l ie n mascim de 15 persones perchël vëniel prià bel de se nuté su cherdan su l 0471 797554 o scrijan a info@museumgherdeina.it.



Ciuna fazion à pa la cultura te nosta vita? 
Na sëira de descuscion tla galaria Doris Ghetta n ucajion dl’Enes dl’Ert 
La sëira de descuscion ie ai 8 de setëmber y scumëncia dala 20:30 inant, ora Puntives tla galaria Doris Ghetta. 
Cun Walter Moroder, artist, André Comploi, diretëur per la Istruzion, la Furmazion y la Cultura ladina y l cumpusidëur Eduard Demetz rujenons dla mpurtanza dla cultura te nosta vita da uni di. L’ert, la mujiga, la leteratura, l chino y l’architetura arichësc nosta vita, cunlieia la persones y crieia nce mpulsc economics per nosta sozietà. 
La muderazion fajerà Greta Langgartner.