La Usc di Ladins

Cie te lecordes'a de ti prim ot ani de vita tla Ucraina?
Vlad Zagorodniy Stajove te na pitla zità daujin a Kiev, la capitela dl'Ucraina. Chëi ot ani ie stac scialdi biei. Ne fajove nia auter che fé damat te verzon y nce cun i autri mutons che stajova daujin. Ove n bel gran cian che stajo­va for pra mé. An na gran cësa cun n gran verzon cun po­mo­dores, cioles, lëns da versura. Fove n mut che fajova gën damat ala­lergia. Davia che son l sëul mut, stajovi suvënz cun mi jurmans, che ie majeri che ie, y perchël jivi cun ëi te zità a ti cialé al marcià o a cumpré roba da maië
Te mi pitla zità se cunesciova la jënt aldò tla streda te chëla che n stajova. Defati, cunesciovi ie duc i mutons dla streda ulache stajove, ma nianca un n mut dla streda che univa riesc do. L semea feter, ma l fova nsci.
Tl'Ucraina éi fat la prima ele­mentera, ma ne l'é nia fineda, ajache son unic a sté tla Talia per gaujes de lëur.

Ciunes ie pa la majera desferënzes che te es bel riesc udù ora danter la Ucraina y Gherdëina?
Na gran desferënza che me é bel riesc udù ora canche son ruvà te Gherdëina fova i crëps, davia che ie vivove tla planadura y ne n'ove mo mei udù i crëps. Nce l luech ie scialdi autramënter: ulache stajove dant fova duta la stredes ndrëtes y la cëses una vis-à-vis dl'autra. Tlo iel plën de raides y deslivei.
Me lecorde nce n'autra desfe­rënza, pra la rodes: da mé śaròven cun l pedal, nia pra la stangia. Sëuraprò fòvel nce: la nudadoia, che ne n'ove mo mei udù, truepa plazes da fé damat, i trampolins. Chësc fova n mond plën de dever­timënt per mé. Nce la cëses sa mont, la furnadoies, i purtoies per la lueses, i schi, fova dut cosses che ne n'ove mei udù. (Ntervista: Bruno Maruca)

De plu tla edizion stampeda de La Usc di Ladins o sun l e-paper a paiament www.lausc.it/e-paper