La Usc di Ladins

Ai 4 de merz iesen julei a Corvara, ulache n ël polach ova n drë’ mel dansù. L suspet fova chël de n anorism - n ie julei limpea tl spedel de Bulsan. Do marënda ie l joler pona julà sun Sochers per n ël che se ova fat mel tuman cun i schi, che n à menà tl spedel de Persenon.

Ai 5 de merz à la zentrela de Bulsan mandà l joler sun Mont de Sëuc, per un dai schi che fova frit ora de purtoi. Do la prima vijites l àn ciarià tl sach vacuum y ie julei limpea tl spedel de Bulsan, da ulache n ie piei via per l proscimo ntervënt, chëst iede te Sëlva, per n ël che fova unit da nescia: nce ël àn menà a Bulsan.

Ai 6 de merz iel stat n ntervënt via n Fascia, ulache l ti ova dat l bòt a n ël. Purtruep ne iel plu stat nia da n fé. Domesdi àn mo cherdà l joler sun Ciampinëi, ulache un fova tumà cun i schi. Pervia dl tëmp melsegur àn lascià ju ntant mé l dutor y i sucoridëures per vijité l pazient, che se ova rot na giama. Cun l sucors sun purtoi àn menà l pazient tla barela nchin sun Plan de Gralba, da ulache l ie furnà inant cun l’ambulanza nchin te spedel.

Ai 7 de merz iel stat doi ntervënc sun purtoies, un tla Val Badia y un sun Mont de Sëuc. Ntëur marënda iesen pona julei a Corvara ulache na jëuna ova abù n atach de mel de San Valantin tla furnadoia. N la à meneda cun l joler tl spedel de Burnech. Dala 21:20 à na ambulanza menà adalerch n’ëila cun n gran mel al jenodl, che n à vijità y menà cun l joler tl spedel de Persenon.

De plu tla edizion stampeda de La Usc di Ladins o sun l e-paper a paiament www.lausc.it/e-paper