La Usc di Ladins

A Vermiglio te la Val de Sole ai 5 e 6 de jené l’é stat metù a jir i Campionac taliegn de schialpinism per joegn che à dat sù i titoi de la spezialità classic per la categorìes Cadetti, Junior Under 23 de ic e eles. I organisadores del Schi Club Brenta Team à metù a jir ence na competizion promozionèla per senior e master.

Passa 300 joegn é rué da duta la Tèlia per se dèr batalia te la proes individuèles de chesta disciplina. Anter chisc ence Giorgia Felicetti da Ciampedel, atleta del Ski Team Fascia. La joena fascèna se à vadagnà l secondo sciaier del podie e la medaa de arjent col temp de 1h23’48” te la proa resservèda a la categoria Under 23, n percors lonch 8,26 km con passa 1000 metres de deslivel, a la spales de l’atleta de l’Eserzit Giulia Murada, pruma col temp de 1h18’23” e tedant a Marianna Mondini de l’Adamello Ski Team, terza con n destach de 38’58”.

Per chel che vèrda i omegn a venjer te la U23 l’é stat Davide Magnini, atlet de l’Eserzit, col temp de 1h26’35” a la fin di 12,5 km e 1433 metres de deslivel, tedant a Nicolò Ernesto Canclini e Andrea Prandi, duc e doi del S.C. Alta Valtellina. 

A trionfèr te l’autra categorìes l’é stat Erika Sanelli e Luca Vanotti te la Cadetti, Lisa Moreschini e Matteo Sostizzo te la Junior; anter i Senior à vent Giulia Compagnoni e Federico Nicolini e anter i Master se à afermà Janka Kollarova e Ivan Antiga.  (cri.m)