La Usc di Ladins

Se à avert te Fascia ai 8 de jené la 13^ edizion del Campionat Ladin de schi da Mont. La pruma de la cater proes de la Raida Ladina, 22^ edizion del Trofeo Mario Iori, se à dejout da Dèlba fin sun Ciampac, sun n percors de 3800 metres con dislivel de 684 metres.

Zirca 120 concorenc é peé via da sera te paìsc per ruèr fin sal Tobià del Giagher. Da les 7 à tacà a partir i amadores e da les 8 en linia i atlec.

A ruèr prum assolut, col temp de 29 menuc e 27 seconc l’é stat Alex Oberbacher, atlet de Gherdena del 1994 che cor coi Bogn da Nia. Alex l’à fat miec che Filippo Beccari de Bela Ladinia (30.55) e al terzo post l’é ruà Simone Manfroi, clas 1990 di Bogn da Nia.

Da segnalèr l 16° post assolut de Ivano Ploner (clas 1970) prum di Over 50 te 35.59, e l 18° de Luca Vuerich de Bela Ladinia (clas 2002) prum di Under 18 col temp de 36.15. 

Anter la eles Erica Turi de Dolomiti Ski Alp à passà via per pech (41.00) la badiota Heidi Dapunt de Badia Sport (41.25); la doi eles à concostà l 50° e l 51° piazament assolut. La miora Under 18 l’é stat enveze Beatrice Coleselli del 2003 del Sc Nordico Marmolada, 100^ assoluta tel temp de 49.27.

L Trofeo Mario Iori l’é la pruma de 4 garejèdes de la Raida Ladina, che va inant ai 17 de jené via Rèba con la 17^ edizion de La Lors da Reba, e dapò ai 14 de firé vin Badia con la 10^ edizion de la Costa Oskar a San Ciascian e la se serarà sù en mercol ai 11 de mèrz te Gherdena con la 15^ Rodes Gherdëina a Selva, olache sarà la premiazion finala. L Campionat Ladin de schi da Mont vegnarà vent dal concorent che concostarà più ponts te la classifica generèla finala che vegnarà fora tolan i 3 resultac miores arjonc anter i atlec che se à scrit ite dantfora a dutes cater la garejèdes de la Raida.

Classifica:
1. Alex Oberbacher, Bogn da Nia (29.27); 2. Filippo Beccari, Bela Ladinia (30.55); 3. Simone Manfroi, Bogn da Nia (31.04); 4. Gabriele Depaul, Bogn da Nia (31.06); 5. Thomas Trettel, Asd Cauriol (31.41); 6. Mauro Rason, Bela Ladinia (31.48); 7. Mattia Giuliani, Bogn da Nia (32.47); 8. Manuel Giacomelli, Bogn da Nia (33.37); 9. Michael Irsara, Bogn da Nia (34.00); 10. Pierangelo Giacomuzzi, Asd Cauriol (34.18.)

 (Lucia Gross )