La Usc di Ladins

Dal monn dai schi vëgnel na noela püch plajora. La sajun de copa dl monn dl campiun d’Al Plan Manfred Mölgg é rovada, do na burta tomada pro le slalom gigant de Adelboden, en sabeda ai 11 de jená. L’inzidënt i é sozedü tla secunda manche dla gara. Manfred é pié jö y do incër mez menüt éra sozedüda: na tomada, te chëra che al s’á rot les crujades dl jenëdl dërt, olache al é le de do gnü operé a Porsenú. Bele d’agost dal 2014 s’âl tratan n alenamënt rot la corda d’Achil dla iama dërta. Iló s’â le campiun remetü te n tëmp da record. I ti fajun les mius aodanzes, che le prozes de varijun pois ince chësc iade jí inant debota.

I un albü l’ocajiun da s’la cunté cun Manfred. Ci che al nes á dit, podëise lí tla proscima ediziun de La Usc di Ladins.  (pablo)