La Usc di Ladins

Dò di Campionac del Mond de Aspen, l freestyle à fat tapa te la Svizra per la finèles de Copa del Mond de brea. L’ultim apuntament de l’an l’é jit en scena su la neif elvetica con na garejèda de slopestyle stata ai 28 de mèrz al Corvatsch Park de Silvaplana.
Anter i omegn l’é stat dominie norvegeis, con Marcus Kleveland che à vent la medaa de or de tapa e l’à metù coscita la mans ence su la sfera de crestel, anzi does conscidrà l prum post de spezialità e generèl, che vèl na sajon entria. Sul podie svizer con el l canadeis Liam Brearley e l’american Chris Corning.
Anter la eles enveze ge à bastà la 4^ piaza a l’austriaca Anna Gasser per venjer la sfera, ence ela con la dopia festa de spezialità e generèla. L’ultima garejèda resa de l’an é stata venta enveze da la giaponeisa Reira Iwabuchi, con sia compagna Kokomo Murase 2^ e l’australièna Tess Coady 3^.
A l’apuntament à tout pèrt ence l portacolores ladin tel mond Emil Zulian. L talent fascian no l’à purampò arjont n bon resultat a cauja de doi rebaltèdes te le run de califica. Chest ge à neà l’azess a la finèles, con n 50° post assolut a la fin de la proa.

Emil enstes ne à contà de più sun chesta sajon e sun sia prospetives te l'intervista che podede lejer su La Usc stampèda de vender ai 2 do oril.   (Daniele Verra)