La Usc di Ladins

Saon che mé l’é sinonim de roda. Dò che i freic de la pruma aisciuda i é oramai passé, o amancol coscita cognessa esser, duc i pascioné tol fora la rodes e, per ge dèr maor sodesfazion, vegn semper endrezà garejèdes e campionac che dapodò va inant per dut l’istà. Te chisc dis se sent trop rejonèr de roda da strèda ajache l’é pontà via l Giro, ma ence la garejèdes de roda da mont les scomenza a esser tropes dajan vita ai neves zircuic 2021. Desche zenza donca, ziclisć da dut entorn e de ogne spezialità à tacà sia sajon agonistica, anter ic ence chi ladins che porta stroz l’inom de noscia valèdes.

XCO de Laces, al via la Südtirol Cup
Giornèda de ziclism a Laces (BZ), olache en sabeda ai 15 de mé se à coret la pruma proa de la Südtirol Cup 2021. Gran giornèda per i colores trentins, con Andrea Righettini che l’é stat bon de comanèr la classifica Open sui 4 giri. L’atlet de l’Olympia Factory Team l’é stat defat bon de se vadagnèr l’or col temp de 1h14’54”, batan coscita Martino Fruet (+1’48”) e Jan Laner (+3’30”). Anter la eles l’é stat enveze Debora Piana a conquistèr la venta te 1h11’29” su la trei rondes con Anna Oberparleiter seconda (+1’35”) e Julia Maria Graf terza (+3’03).

A Laces l’é stat resultac da batimans ence per i colores ladins.
Anter i Open troon Mattias Rosso, fascian clasc 2002 de l’US Litegosa che l’é stat bon de se vadagnèr na maraveousa piaza te la Top-10, seran sù la proa sui 4 giri te 1h22’15” a zirca 7 menuc dal venjidor assolut. Chesta prestazion ge à fat vadagnèr al coridor de Soraga la 9^ piaza, che tegnù cont de la joena età la dèsc dassen na gran sodesfazion.
Te la categoria Elite Sport anter i prumes 10 l'é doi atlec de Rodes Val Badia Raiffeisen: Franz Wieser che à fat 4 giri tel temp de 1h35'36" ruan al 6° post e Giordan Nagler 8° te 1h39'31". Giusta fora da la Top-10, al 11° post, troon dapò Alex Bauer de Rodes Gherdëina.
Gran sodesfazion e podies ladins anter i master: Gabriele Depaul da Dèlba che cor per l Team Spicebikes con la proa sui 3 giri te 1h01’36” l’à fat segnèr l mior temp dò i profescionisć, venjan garejèda e categorìa M1. Prum post ladin ence ti Master2 con Markus Hofer de Gherdëina che cor per la Saltos Mountain Xtream e l’à serà sù sia proa te 1h06'44" e ti M4 col compagn de valèda e de squadra Thomas Piazza che à vent sia cotegoria fenian fora te 1h05'54". Secondo post enveze ti M5 per Viktor Paris, da Nalles ma semper de la sozietà di Saltos de Gherdëina te 1h07'49".
Anter i Juniores bel 6° post de Daniel Rungger de Rodes Val Badia Raiffeisen che à fenì i 3 giri te 1h02'34".

Duc i resultac su La Usc stampèda de en vender ai 21 de mé del 2021  (Daniele Verra)