La Usc di Ladins

Endèna che se sparpagna anter la jent mile e mile opinions sul mudament che à padì la Tapa del Giro Sacile-Ampez, con l’anulament de la rampinèdes sui jouves de Fedaa e Pordoi, la cronaca sportiva ne porta a rejonèr de roda da mont. Semper roda, ma chela sui terens più mèlsegures di troes da mont, che à manco ressonanza anter i media, ma che veit corer i ziclisć sot a ogne temp e te ogne pauta. Sessanta chilometres n muie asvelc chi che à caraterisà la 14^ edizion de la Southgarda Bike de Medole, apede l Garda, che se à serà sù con n beliscim cef a cef ti omegn anter l norvegeis Ole Hem e Andrea Righettini e con na venta en solitaria per Serena Calvetti. L’endesfida endrezèda dal Trek Zerowind MTB Challenge se à dejout en domenia ai 23 de mé con la partezipazion de zirca 900 coridores spartii ti percorsc marathon (60 km) e crosscountry (30 km).

Bona la proa fascèna
Desche semper no l’é mencià la prejenza ladina te l’endesfida. Bona proa per l fascian Gabriele Depaul, anter i miores en classifica. L coridor del Team SpaceBikes l’é stat bon de serèr la proa te 2h05’55”, vadagnan la 17^ piaza assoluta, jù dal podie de categorìa Master1 per na soula posizion con l 4° post. A tor pèrt a la proa ence la sociazion sportiva Fascia Bike, enstouta con l portacolores Valerio Bacchiocchi che l’é stat bon de arjonjer l travert te 2h24’15” te la 164^ piaza assoluta e 21° de categorìa Master2.

De più su La Usc stampèda de en vender ai 28 de mé del 2021.  (Daniele Verra)