La Usc di Ladins

L cruzie che la situazion sanitèra posse condizionèr a na vida pesoca ence te si aspec agonistics la sajon su la neif giusta tachèda no l é desfantà, ma la Federazion di Sport da d’invern del Trentin à volù endrezèr na dì de festa e de fiduzia.

L »Fisi Event« metù a jir al PalaLevico te la Valsugana ai 20 de november l é stat n dopie apuntament: per premièr i atlec che se à metù al luster te la sajon passèda ma ence per portèr dant la neves sportives per chest invern che vegn, rich de apuntamenc emportanc.

Te chest moment l era de gran emportanza dèr n segn de fiduzia e de speranza de poder peèr via do n invern passà da desmentièr, e chest l é stat l messaje ruà da duc i raprejentanc istituzionèi: l president de la Provinzia de Trent Maurizio Fugatti, l president de la FISI trentina Tiziano Mellarini, l assessor al sport e turism Roberto Failoni, l vizepresident vicare de la FISI nazionèla Angelo Dalpez, la presidenta del Coni trentin Paola Mora, l president del Consei provinzièl Walter Kaswalder e i raprejentanc del teritorie. 
Te la 12 disciplines su la neif del Comitat trentin l é stat pervedù vèlch neva ence tel setor tecnich, anter chestes l’encèria de diretor tecnich per l paslonch a n arcedador de gran esperienza internazionèla desche  Giuseppe Sepp Chenetti da Moena, che da trei egn l era consulent tecnich de la Federazion provinzièla. Autra neva per Fascia rua dal setor de la brea con la nomina de Alessandro Cloch da Cianacei per l cross. L obietif l é enjignèr e fèr crescer al miec i joegn atlec. 
N muie de chisc se à metù al luster con de bogn ejic jà l invern passà e chest apuntament l é stat ence la ocajion per valorisèr la ezelenzes trentines didan a fèr crescer gaissa e fiduzia, dant de prejentèr l’Agenda 2022 con duc i calandères che veit ence Fascia protagonista tel meis de dezember con trei competizions internazionèles.

Maor informazions e la lista de duc i premié fascegn é da poder lejer su La Usc stampèda de vender ai 26 de november.   (Lucia Gross)